Ааспыт сылларга «Анаабыр алмаастара» хампаанньа иһинэн тэриллэн үлэлээбит «Бөртө сылгы собуота» ХЭТ (дириэктэр Александр Павлов) быйыл күһүҥҥүттэн «Туймаада» ҮАПК чэрчитинэн үлэлиир буолла.
edersaas.ru
Үлэ-хамнас хас да көрүҥүн тэрийэн, II Малдьаҕар нэһилиэгин дьонун аҥаарын кэриҥин дохуоттаан олорор хаһаайыстыба бары көрдөрүүлэринэн өрөспүүбүлүкэҕэ инники күөҥҥэ сылдьар. Ол курдук, ааспыт сыл түмүгүнэн ынаҕын ахсыттан 3 тыһ. тахса киилэ үүтү ыабыта. Бастыҥ ыанньыксыттар Аммосова Екатерина, Борисова Раиса, Трофимова Валентина, Таппыева Анастасия көрдөрүүлэрэ мантан таһыччы үрдүк. Быйылгы кыстыкка хаһаайыстыба барыта 717 ынах сүөһүнү кыстатан турар. Бу иһиттэн ыанар ынаҕа 341, ыччат сүөһүтэ 344.
Хаһаайыстыба үс сыллааҕыта ирдэбилгэ эппиэттиир толору хааччыллыылаах комплексы туттан, ыанньыгын барытын онно киллэриэҕиттэн, ынахтарын эрдэ төрөтөн, ыанар кэмнэрин балачча уһатта. Инньэ гынан, билигин хайа-сах сэттэ ынах төрөөн турар. Биригэдьиир Ульяна Семенова этэринэн, сүрүн төрүөх тохсунньу-олунньу ыйдарга кэтэһиллэр, оттон аны саас саҥа төрүөхтээх отут туҥуй бургунаһы көрүү-истии эдэр, кэскиллээх ыанньыксыт Анастасия Григорьеваҕа итэҕэйиллибит. Билигин күннэтэ биир туонна үүт ыанан, үүтү астыыр сыахха туттарыллар.
Ааспыт бээтинсэҕэ Улахан Аан бөһүөлэгин “Аан аартык” Сынньалаҥ киинигэр Тыа хаһаайыстыбатын күнэ ыытылынна. Бу киэһэ хайҕал-махтал тыллара харыларын күүһүнэн үлэлээн үрүҥ илгэни үрүлүтэр, эмис эти дэлэтэр ыанньыксыттарга, сылгыһыттарга, мэхэньисээтэрдэргэ, үлэни-хамнаһы тэһиинниир исписэлиистэргэ ананна. Үгүс киһи Тыа хаһаайыстыбатын министиэристибэтин, “Туймаада” ҮАПК, Хаҥалас улууһун, нэһилиэк дьаһалталарын итиэннэ хаһаайыстыба Махтал суруктарынан, Грамоталарынан наҕараадаланна. Уон үһүс сылын таһаарыылаахтык үлэлиир, ынаҕын ахсыттан үс тыһыынчаттан тахса киилэ үүтү ыыр бастыҥ ыанньыксыт Екатерина Аммосова уонна тутаах үлэһит Николай Пахомов “Тыа хаһаайыстыбатын туйгуна” аатынан бэлиэтэннилэр.
Бэтэрээннэр да умнуллубатылар. Сопхуос саҕана ыанньыксыттаабыт, 80 саастаах Елизавета Максимоваҕа “II Малдьаҕар нэһилиэгин Бочуоттаах олохтооҕун” үрдүк аата иҥэрилиннэ. Саха судаарыстыбаннай тыа хаһаайыстыбатын академиятын быйыл бүтэрэн, арыы сыаҕар технологтыыр Александр Соловьеву эдэр исписэлиис быһыытынан чиэстээһин сиэрэ толорулунна. Сайын биригээдэ састаабыгар киирэн, окко үлэлээбит оскуола оҕолоругар «Үлэ киниискэтэ» туттарыллыыта туспа өрөгөйү үөскэттэ.
Киирии билиэтинэн лотерея оонньонон, бааттаахтар борооскуттан саҕалаан убаһа иһигэр тиийэ сүүйэн үөрдүлэр-көттүлэр. Үлэ дьонугар анаммыт дьоро киэһэни саха эстрадатын артыыстара Мото Куо уонна Сахамин кэлэн киэргэттилэр.
Раиса Сибирякова, «Саха сирэ» хаһыат, edersaas.ru