Бүргэс үрдүгэр сылдьар балыксыттар

Ааптар: 
Бөлөххө киир:

Кэлиҥҥи сылларга  сокуоҥҥа уларыйыы киирэн, хоту улуустар балыксыттарыгар кэккэ уустуктар үөскээтилэр. 


Аллайыаха Чокурдааҕыттан кэлбит  «Дьиэ кэргэн родовой общинатын сойууһа» диэн община салайааччыта Владимир Нестеров 3,5 туонна чыыр, уомул, күндүөбэй, сыалыһар уо.д.а. балык арааһын атыыга аҕалбыт.

Сайыҥҥы кэмҥэ отучча үлэһиттээхпин. Бастайааннай үлэһитим уончалар. Дьаарбаҥканы биһиги, балыксыттар, батарыы бырааһынньыгын курдук ылынабыт. Быйыл кыттааччы быдан аҕыйах курдук көрдүм. Арааһа, уу түһэн, балыксыттарга охсуулаах дьыл буолбут быһыылаах. Ыраах общиналар ол иһин кэлбэтэхтэрэ буолуо, — диэн санаатыр үллэстэр балык хаһаайыстыбатын салайааччыта.

Владимир Нестеровтан сокуон Аллайыаха балыксыттарыгар хайдах дьайарын туоһуластым.

«Нуорма» диэни олохтуохтарыттан ыла, бэрэбиэркэнэн хаайан, хаарчах бөҕөҕө түбэстибит. «Рыбоохрана» диэн тэрилтэ үлэһиттэрэ үстэ-түөртэ бэрэбиэкэлииллэр. Ытарааптана иликпит гынан баран, бүргэс үрдүгэр сылдьабыт. Киһи үлэлиир көҕө сүтэн хаалар. Туох аанньа буолуой, балык булдугар ылларан сырыттаххына, субу-субу докумуоҥҥун көрдөөн, пограничниктарга тиийэ кэлэллэр. Аны көҥүл ыларга билбэт өрүппүт элбэх эбит. Ол курдук, балыктааһын быраабылатынан, биригэдьиир суох буолла да, балыктыа суохтаах эбиккин. Биир учаастакка дьонум биригэдьиирдэрэ ыалдьан хаалан, киһилэрин уларытан кэбиспиттэрин, бэрэбиэркэлээччилэр ылыммакка, балыктыылларын бобон кэбиспиттэр этэ. Бу соторутааҕыта буолбут мунньахха Ленскэйдээҕи территориальнай управление исписэлиистэрэ быһаарбыттарынан, көҥүл ыларга биригэдьиири солбуйарга 3-4 киһи аатын суруйуохха сөп эбит. Биһиги биир эрэ киһи суруллара буолуо дии саныыр этибит. Онон билбэккэ, ыалдьыбыт биригэдьиир  үлэтигэр тахсыар диэри үлэ атахтана сылдьыбыта, — диэн кэпсиир сэһэргэһээччим.

Владимир Нестеров: «Өрүс пордугар биирдэ эмэ кэлэн көрөөр эрэ, балыгы тиэйэн аҕалыы саҕана бэрэбиэркэлээччи элбэҕин…» диэн сөҕө-махтайа кэпсээн эрдэҕинэ, оруобуна дастабырыанньаларын тэлимнэппитинэн: «Санитарнай киниискэҕитин көрдөрүҥ. Бу тоҕо остуолгутугар ыскаатаргыт суоҕуй?» — диэн ыйытан субурутан, бэрэбиэркэлээччи кыргыттар баар буола түстүлэр. Онон Владимир Нестеров болҕомтото бүтүннүү аны бэрэбиэркэлээччилэргэ туһаайылынна. Мин, кэпсэтэн бүппүт киһи быһыытынан, саҥата суох тэйэн биэрдим…

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриитэ.

+1
0
+1
0
+1
0
+1
0
+1
0
+1
0
+1
0