Маны аах Уопсастыба

Бүрээттэр саха сылгытын иитиини сөргүтэр толкуйга киирдилэр

Бүгүн Бурятия уонна Саха сирин олохтоохторо куйаар ситиминэн кэскиллээх боппуруостары дьүүллэстилэр. 

Бу икки бырааттыы өрөспүүбүлүкэни биир ситимнээбит дьонунан саха атын тургутар соруктаах Тымныы полюһуттан Өймөкөөнтөн Москубаҕа диэри ыраах айаҥҥа туруммут  ыччаттар Дугуйдаан Винокуров уонна Мичил Неустроев буолаллар.

Суолталаах тэрээһини  Арассыыйаҕа киэҥник сырдатыы уолаттар дойду эрэгиэйэннэрин улахан куораттарыттан бастакыларыгар Улан Удэттэн саҕаланна.

Саха сылгыһыттарын кытта пресс-кэмпириэнсийэни Нуучча географическай уопсастыбатын Саха сиринээҕи отделениетын салайааччыта Александр Горохов уонна бу уопсастыба чилиэнэ Егор Борисов көҕүлээн тэрийдилэр. Саха атыгар сыһыаннаах кэпсэтии сыыйа олус дириҥ ис хоһооннонон барда. Онон бу кэпсэтиини сыыйа тус-туспа тиэмэҕэ арааран сырдатыам.

Биир  кэскиллээх боппуруоһу бастакынан Бурятияҕа сылгыны үөрдээн иитиигэ туһуламмыт судаарыстыбаннай сулууспаны салайар Далай Галсанов көтөхтө. Кини бырааттыы өрөспүүбүлүкэлэр сылгыны атастаһыы үлэтин чэрчитинэн 1983 сыллаахха Дьокуускайтан Улан Удэҕэ диэри 700-чэкэ төбө сылгыны аҕалбыттарын иһитиннэрдэ.

Саха сирин сылгыларын иитии  хайысхата судаарыстыбаннай тутул кэмигэр өссө да сайдыа эбитэ буолуо да, уларыта тутуу кэлэн,сылгылары кэтэх хаһаайыстыбаларга үллэстибиттэрэ.   Онон бу кэскиллээх үлэни сөргүтэн, саҥа хайысханы тобулуохха наада. Биһиги сылгыны эрэ буолбакка, ынах сүөһүнү, як оҕуһу кытта Саха сиригэр ыытыахпытын сөп. Онон эдэр сылгыһыттар бэрт кэскиллээх дьыаланы сөргүтүүгэ бэйэлэрин холобурдарынан суолу астылар, — диэн бэлиэтээтэ Далай Галсанов.

Пресс-кэмпириэнсийэҕэ кыттыыны ылбыт племенной үлэ салайааччытынан үлэлээбит СӨ тыа хаһаайыстыбатын миниистирин солбуйааччыта Артем Александров бу боппуруоһу болҕомтоҕо ылла.

Онон Өймөкөөн сылгыһыттара Дугуйдаан Винокуров уонна Мичил Неустроев ыраах айаннара өрөспүүбүлүкэҕэ сылгыны үөрдээн иитиигэ сонун сүүрээни саҕан, умнулла быһыытыйбыт кэскиллээх тосхолу сөргүтүүгэ олугу уурда.

 

Елена ПОТОЦКАЯ, «Саха сирэ» хаһыат. 

 

1
0
Telegram Whatsapp