Бүгүн, ахсынньы 27 күнүгэр, Саха циркэтигэр саха төрүт оонньуутугар хапсаҕайга «Саха Арена хапсаҕай» диэн турнир буолар. Үһүс төгүлүн ыытыллар күрэскэ бөҕөстөр 75 уонна 95 киилэҕэ диэри ыйааһыннарга күүстэрин холоһуохтара.
Быйылгы түһүлгэҕэ Саха сирин бастыҥ хапсаҕайдьыттарын сэргэ, ыаллыы Бурятияттан үс тустуук ыҥырыллан кэллэ. Ол курдук, бүгүн циркэ көбүөрүгэр көҥүл тустууга спорт үтүөлээх маастара, Европатааҕы бастакы оонньуулар кыайыылаахтара, Арассыыйа хас да төгүллээх чөмпүйүөнэ Александр Богомоев, дойду чөмпүйэнээтин призера, аан дойду Кубогын призера Баяр Цыренов уонна кэскиллээх маастар Алексей Сабидаев тахсыахтара.
Санатан эттэххэ, 2011 сыллаахха Дьокуускайга ыытыллыбыт көҥүл тустууга дойду чөмпүйэнээтин кэнниттэн тэриллибит хапсаҕай күрэһэр Александр Богомоев чөмпүйүөн аатын былдьаһар хапсыһыыга Петр Сивцевкэ хотторон турардаах. Бэҕэһээ буолбут пресс-кэмпириэнсийэҕэ бүрээт бөҕөһө бэлэмим куһаҕана суох, дойдубар бэл 120-130 киилэлээх утарылаһааччыларбын бүдүрүтүлээбитим диэн билиммитэ.
Тэрийээччилэр Дьулустаан Захаров, Толлуман Барашков итиэннэ Батас Верховцев, көрөөччү интэриэһин тардар инниттэн, күрэхтэһии быраабылатын саха биллиилээх бөҕөстөрө – олимпийскай чөмпүйүөн Павел Пинигин, хапсаҕай бочуоттаах маастардара Василий Стручков- Абый Бааска, Андрей Яковлев, күрэс солбуллубат кылаабынай судьуйта Петр Бурцев кыттыыларынан чочуйан оҥорбуттарын этэллэр.
Хапсаҕай федерациятын толорооччу дириэктэрэ Алексей Мостахов саҥа көлүөнэ дьон саха төрүт оонньуутун пропагандалааһыҥҥа ылсыбыттарыттан үөрэрин, инниктин маннык тэрээһиннэр дьон-сэргэ киэҥ сэҥээриитин ылан, саҥалыы тыыны киллэриэхтэрин эттэ.
«Саха арена хапсаҕай-3» бүгүн, ахсынньы 27-гэр, Саха циркэтигэр киэһэ 19-00 чаастан саҕаланар.
Роман ПОПОВ, «Саха сирэ» хаһыат, edersaas.ru
Хаартыска: интэриниэттэн ылылынна