Кулун тутар 11 күнүгэр Аан дойдутааҕы бүөр күнэ бэлиэтэнэр. Билиҥҥи кэмҥэ бүөр ыарыыларын эмтииллэр, ыараханнык ыалдьары сэрэтэр, тохтотор ньымалар бааллар.
Пандемия кэмигэр олоҕурбут ыарыылаах дьоҥҥо, ол иһигэр гемодиализка сылдьааччыларга уонна донор бүөрдээхтэргэ, ураты болҕомто ууруллар. Онон быйылгы бэлиэ күн “олоҕурбут бүөр ыарыылаах дьон үчүгэйдик, толору олоҕунан олоруохтарын сөп” диэн девизтээх ыытылар.
Саха сиригэр 2014 сылтан пациеннар түмсүүлэрэ үлэлиир. Кинилэр бүөр ыарыһахтары өйүүр, көмөлөһөр сыаллаахтар. Икки сүрүн бырайыактара Бэрэсидьиэн граннарын пуондатын кыайыылаахтара буолбуттара.
“Олох бэлэҕэ” социальнай бырайыак өрөспүүбүлүкэҕэ олорор бүөрдэрин биэрбит донордар доруобуйаларын харыстыыр, “Инникигэ эрэл” бырайыак ыарахан ыарыһахтары уонна нефрологтар түмсүүлэрин өйүүр сыаллаахтар.
Пандемия кэмэ бүөрдэрэ ыараханнык ыалдьар дьоҥҥо кутталлаах. Бырайыак чэрчитинэн, кинилэр ИФА ньыматынан коронавируснай инфекцияҕа босхо анаалыс туттарар кыахтаахтар. Ыарыы муҥутаан элбээн турар кэмигэр, былырыын күһүн диализнай кииннэргэ ыарыһахтарга уонна үлэһиттэргэ анаалыстары босхо оҥорбуттара. Ону тэҥэ, диализнай кииннэр үлэһиттэригэр харыстанар таҥастары, тэриллэри түҥэппиттэрэ.
Ыарахан ыарыһахтарга уонна кинилэр чугас дьонноругар уйулҕа өттүнэн өйөбүлү оҥоруу эмиэ улахан суолталаах. Грант көмөтүнэн, кинилэри кытта аан бастаан улахан уопуттаах килиниичэскэй психолог үлэлэспитэ.
Ону тэҥэ, “Инникигэ эрэл” бырайыак чэрчитинэн, донор бүөрдээх пациеннар коронавирустаабыт буоллахтарына, Трансплантология уонна искусственнай уорганнар федеральнай киинигэр эмтэнэ, көрдөрүнэ баралларыгар сөмөлүөтүнэн көтүү ороскуотун төлөттөрөр кыахтаахтар. COVID-19 кини олоҕор, доруобуйатыгар хайдах дьайыа биллибэт.
— Донор бүөрдээх дьон доруобуйаларын харыстыырга улахан уопуттаах федеральнай киин көмөлөһүө диэн эрэнэбит. Донор уорганын ылынан, олоҕун уһатар сыллара, ыйдара – бу пациент кыайыыта, олох туһугар туруулаһыыта буолар. Биһиги пациеннарга уонна нефрологическай түмсүүгэ кыах баарынан көмөлөһө сатыыбыт. Ол үрдүнэн, кыһалҕалар бааллар. Ону бары холбоһон быһаарыах тустаахпыт, — диэн бырайыак салайааччыта Наталия Каратаева этэр.
Бүгүҥҥү күҥҥэ олоҕурбут бүөр ыарыылаах дьон коронавируска иммунитеттарын босхо бэрэбиэркэлэнэр кыахтаахтар. Ол туһуттан “Инникигэ эрэл” социальнай бырайыак куратордарын булан, сибээстэһиэххэ наада. “Инстаграмҥа” сирэйдэрэ: @gift_of_life_ykt.
Ангелина Васильева, “Саха сирэ” хаһыат, edersaas.ru
Хаартыска: Саха сиринээҕи чааһынай мэдиссиинэ килииникэлэрин уонна кииннэрин ассоциациялара.