Маны аах Уопсастыба

Бөрөлөөхтөр кыстыгы бэлэмнээх көрүстүлэр

“Саха сирэ” хаһыат уопсастыбаннай кэрэспэдьиэнэ Людмила Колесова Аллайыаха Бөрөлөөҕүттэн маннык диэн иһитиннэрэр:

— Нэһилиэкпитигэр кыстыкка киирии туһунан эттэххэ, саамай итиинэн-уотунан хааччыйар тэрилтэлэрбит электроыстаансыйа  уонна хочуолунай буолаллар.

Өссө кулун тутар-муус устар ыйдарга оттук – ньиэп, сэлээркэ сыллааҕы нуорматын массыынана тиэрдибиттэрэ. Хочуоллары, дизеллэри өрөмүөннээһин сылын аайы ыытыллар былаанынан барбыта.

Олорор дьиэлэргэ ититэр ситими сууйуу үлэтин түмүктээбиттэрэ. Оскуола, Култуура киинин тэрилтэлэрин дьиэлэрин өрөмүөннээн кырааскалаабыттара.

Күннээҕи аһылык бородууктатын кууһунан атыылыыр тэрилтэ эмиэ массыынанан аҕалбыта. Оттон бу күһүн сибиэһэй аспытын АН-2 сөмөлүөтүнэн парашютунан түһэрбиттэрэ. Үчүгэй хаачыстыбалаах хортуоппуйу, луугу, хаппыыстаны, моркуобу уонна сүбүөкүлэни сайаапка быһыытынан атыыласпыппыт.

Нэһилиэк олохтоохторо бары быһыыны уонна ревакцинацияны анал кыраапыгынан ыла сылдьаллар.

Тымныыбыт саҥа түһэн эрэр, уопсайынан бары кыһыны этэҥҥэ туоруур туһугар бэлэмнээхпит.

Бэлэмнээтэ Женни Стрюкова

Хаартыска: архыыптан

0
0