Аллайыаха улууһун Бөрөлөөх нэһилиэгин култуура үлэһиттэрэ 2016 сылтан “Култуура уонна экология” диэн бырайыагынан үлэлииллэр.
Онон култуура үлэһиттэрэ араас экологическай хамсааһыннары, санитарнай эриэйдэлэри тэрийэллэр, дьон көрүүтүгэр биллэрэр ис хоһоонноох листовкалары оҥорон ыйыыллар, оҕолорго экологияҕа туһуламмыт тэрээһиннэри ыыталлар. Бу ыытар үлэлэрин СӨ Айылҕа харыстабылын министиэристибэтэ өрүү биһириир. Оҕолор “Айылҕа доҕоро” экологическай куруһуогу ордук сэргииллэр. “Зарница” оонньуу эмиэ интэриэһи тардар.
“Биһиги саамай уһук сытар нэһилиэкпит. Онон олохтоохтор олохтон, киин сиртэн хаалбаттарын курдук киэҥ хабааннаахтык үлэлииргэ кыһаллабыт. Өрөспүүбүлүкэбитигэр ыытыллар улахан тэрээһиннэртэн туора турбакка буола сатыыбыт. Ыраах, суол-иис суох сиригэр иһитиннэрэр үлэ күүскэ ыытыллыахтаах. Ол иһин Саха сиригэр буолар үтүө уларыйыылар, Ил Дархаммыт тыын суолталаах ыйаахтарын, дьаһалларын туһунан тиһигин быспакка билиһиннэрэбит”, — диир этно култуура киинин салайааччыта Людмила Колесова.
Женни Стрюкова, edersaas.ru
Хаартыскалары Л.Колесова биэрдэ