Уопсастыба

Бөрөлөөхтөр электроннай таһаарыыга бастакынан суруттардылар

Саха Өрөспүүбүлүкэтин үөрэххэ уонна наукаҕа министиэристибэтэ  уонна “Сахабэчээт”  автономнай тэрилтэ 2019 сылга  оскуола уонна орто үөрэх кыһаларын бибилэтиэкэлэригэр  “Чолбон”, “Полярная звезда” сурунааллар электроннай таһаарыыларын сурутууну тэрийэр бырайыагы оҥорбута.


Бу билиҥҥи курдук почтаны тиэрдии  уустугурбут  кэмигэр сурунааллары ааҕааччыга кэмигэр тиксэриигэ олус табыгастаах уонна үпкэ-харчыга даҕаны быдан барыстаах аан бастакы бырайыагы Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Ольга Балабкина улаханнык сэҥээрбитэ уонна хайаан да күүскэ үлэлэһэргэ сорудахтаабыта.

Сурунааллар электроннай таһаарыыларыгар сурутууну оскуола библиотекалара эмиэ сэҥээрдилэр. Ол курдук, сэтинньи 26 күнүнээҕи туругунан  бастакы сурутуулар баар буоллулар. Бастакынан ыраах Аллайыаха улууһун Бөрөлөөх орто оскуолатын бибилэтиэкэтэ (директор Хабарова Аяна Николаевна)  “Чолбон”, “Полярная звезда”, Усуйаана улууһун  Уус-Куйгатааҕы  орто оскуолата (директор Шестакова Матрена Григорьевна) “Полярная звезда” сурунааллар электроннай таһаарыыларыгар суруттардылар.

“Чолбон” уонна “Полярная звезда” сурунааллар электроннай таһаарыыларын хас биирдии оскуола бибилэтиэкэтигэр суруйтарара үөрэнээччилэр уонна учууталлар наадыйар матырыйаалларын көҥүл хачайдаан ылан туһаналларыгар кыаҕы биэриэҕэ. Инникитин Үөрэх министерствота уонна сурунааллар редакциялара үөрэнээччилэр билиилэрин-көрүүлэрин хаҥатарга итиэннэ учууталлар идэлэрин үрдэтэллэригэр туһуламмыт  кыттыгас куонкурустары, анал бырайыактары тэрийэн ыытар былааннаахтар.

Манна даҕатан эттэххэ, сурунааллар электроннай таһаарыыларыгар суруйтарыы почта нөҥүө суруйтарардааҕар икки-үс төгүл чэпчэки.  Ол курдук, сыл аҥаарыгар сурутуу сыаната 200 солк., оттон сыллааҕы сурутуу — 350 солк. Электроннай таһаарыыга сурутуу туһунан сиһилии “Сахабэчээт” автономнай тэрилтэҕэ 34-18-16 тел. эрийэн билсиэххитин сөп.

 

0
0
Telegram @edersaas20

Добавить комментарий