Бөрөлөөххө табалар, таба-лаар кэллилэр!

Ааптар: 
Бөлөххө киир:

Урукку кэмнэри ахтар буоллахха, Аллайыаха улууһун Бөрөлөөх нэһилиэгэр олохтоохтор түүлээх, балык булдунан, таба иитиитинэн дьарыктанан олорбуттара. Быйыл бөһүөлэкпит 65 сылыгар бэлэх курдук Бөрөлөөх туундаратыгар 30-ча сыл буолан баран 1300 таба кэлбитэ долгутуулаах түгэн буолла.

Ол туһунан өбүгэлэрбит үгэстэрин сөргүтээччи, нэһилиэкпит баһылыга Алексей Николаев бу курдук кэпсиир:

— Усуйаанаттан «Удьуор» көс аҕа ууһун баһылыга Сергей Кимович Филиппов көҕүлээһининэн, Арктика миниистирэ Владимир Черноградскай, Тыа хаһаайыстыбатын миниистирин бастакы солбуйааччы Прокопий Николаев, Аллайыаха улууһун баһылыга Яков Елисеев, Арктика министиэристибэтин үлэһиттэрин, Аллайыаха улууһун тыа хаһаайыстыбатын управлениетын  салайааччыта Петр Сергучев өйөбүллэринэн бу бэйэм төрүттээбит «Аллайыаха улууһугар дьиэ табатын иитиини сөргүтүү» бырайыагым  хамсааһына сөптөөх суолунан баран иһэр диэн үөрэбин.

Уопсайа Хаһааччыйаттан Кылбастаахха диэри 350 км, 18 күн устата айаннаан кэллибит. Саҥа саҕалаан эрэр дьоҥҥо, ыарахаттардааҕын үрдүнэн, сүрдээх интэриэһинэй айан-сырыы буолла. Күн аайы сирбитин-уоппутун алаадьылаан, өбүгэлэрбит үгэстэринэн алгыспытын умнубаппыт. Ол иһин диэххэ — Айыыларбыт үчүгэй да күннэри туруоран биэрдилэр!

Суолбут устунан балыксыттар үүтээннэригэр уонна бэйэбит соһулла сылдьар кибииккэбитигэр хоно сырыттыбыт. Табаларбыт үчүгэйдик хаамтылар, сүтүкпүт суох. Ол оннугар тиэхиньикэлэрбит моһуоктаан эрэйдээбиттэрэ. Ол эрэн саха мындыр дииллэрин курдук, туундара ортотугар тимири кыайан, оҥостон-көрүнэн, тиийиэхтээх сирбитигэр тиийдибит диэн үөрэбит. Биэс табаһыттаахпыт, бары күүстээх санаалаах, туундара хоһуун уолаттара буолалларын дьиҥ дьыалаҕа көрдөрдүлэр. Бөрөлөөхпүт сиригэр-уотугар киирээппитин кытта уолаттарым сирэйдэрэ сырдаан, санаалара көтөҕүллэн, тутталлара-хамсаналлара да түргэтээбиккэ дылы этэ.

Дойдубутугар отучча сыл тухары дьиэ табата үктэммэтэҕин сөргүтэн эрэбит диэн ис сүрэхтэриттэн киэн тутталлар. Мин бэйэм уолаттарбар итэҕэйэбин. Барытын кыайыахпыт диэн эрэллээхпин! Икки нэдиэлэ курдугунан төрүөхпүтүн саҕалыахпыт. Кыылбастаах аттыгар, урукку 2-с нүөмэрдээх ыстаада маршрутунан хамсыыр былааннаахпыт. Сайыныгар Хоромой уонна Уомуллаах губаларын икки ардыгар киирэр былааннаахпыт. Сирбит, айылҕабыт хайдах туруктааҕын сонно миэстэтигэр эрэ билиэхпит сыттаҕа. Бириэмэ көрдөрөн иһиэҕэ. Түгэни туһанан, биир дойдулаахтарбар, сүбэ-ама, күүс-көмө буолбуттарын иһин барҕа махталбын тиэрдэбин!

Людмила Колесова, Бөрөлөөх.

Хаартыскаҕа А.Николаев түһэриитэ.

+1
0
+1
0
+1
0
+1
0
+1
0
+1
0
+1
0