Быйыл бөһүөлэкпит Чкалов тутуллубута 65 сылын бэлиэтээн, араас тэрээһиннэр ыытыллаллар. Бөрөлөөх нэһилиэгэ уос-номоҕо буолар, баай историялаах, аатырбыт суол-иис хаалларбыт дьонноох, үөрэҕи, үлэни өрө туппут ыччаттардаах дойду буолар.
Онон уруккуну сэгэтэн, ахтан-санаан аастахха, төрөөбүт дойдубут историята түҥ былыргыттан силистэнэр. Ол курдук, аан дойдуга тиийэ биллэр Бөрөлөөхтөөҕү мамонт кылабыыһата уонна былыргы киһи олорбут сирэ манна булуллубутунан сураҕырар. Чкалов бөһүөлэгин историята өссө дириҥ. Манна 1954 сыллаахха икки оройуон, Аллайыаха уонна Усуйаана холкуостара, олохтоохторо көһөрүллэн, холбоһон олохсуйбут сирдэрэ, бу дьон дьылҕалара туспа кэпсээн… Ханнык баҕарар дойду дьонунан сураҕырар буоллаҕа. Ол курдук, биһиги нэһилиэкпит саамай ытыктыыр киһитэ Евдокия Николаевна Горохова, Бөрөлөөх сириттэн кынат анньынан, Сахабыт Өрөспүүбүлүкэтин салайан олорбутунан киэн туттабыт. Тэрээһиннэртэн биир түгэни кэпсиир буоллахха, ыам ыйын 6 күнүгэр, эҕэрдэ кэнсиэр буолла. Улууспут кииниттэн Чокурдаахтан, биир дойдулаахтарбыт, ыалдьыттар кэлэннэр кыттыыны ыллылар. Ол курдук, биһиги улууска холобур буолар “Индигиир” уонна “Тэтим” үҥкүү бөлөхтөрө эҕэрдэлээн үөртүлэр. Бу бөлөхтөр айар түһүлгэлэрин салайааччы Лариса Федоровна Рожина буолар. Кини оҕо, эдэр ыччат үүнэр-сайдар дьоҕурун сайыннарар, олох киэҥ аартыгар бэлэмниир, сырдыкка-кэрэҕэ угуйар сыаллаах үлэлиир буолан, ситиһиитэ үрдүк, кэскиллээх үлэни ыытарын иһин көрөөччүлэр, төрөппүттэр махталлара улахан. Барытыгар дьоҕурдаахтарыттан, талааннаахтарыттан олус үөрэбит. Өбүгэлэрэ олорбут сирдэригэр кэлэн чиэстээн, кэриэстээн, ытыктаан барбыттара кэрэхсэбиллээх. Инникитин өссө сайдан, аартыктара арылла турдун диэн алҕыы хааллыбыт.
Хаартыскалары: Л.Ф.Рожина тиксэрдэ
Бэлэмнээтэ Людмила Колесова