Бөрөлөөххө биэлсэр үлэлии тиийбит. Ол туһунан манна ааҕыҥ.
Аллайыаха улууһугар биир биллэр кыһалҕанан нэһилиэктэргэ эмчиттэр тиийбэттэрэ буолар. Бу ааспыт сыл бүтүүтэ “Земскэй быраас” диэн бырагыраамаҕа киирсэн төрөөбүт нэһилиэгэр Бөрөлөөххө эдэр эмчит Татьяна Григорьева (Енохова) үлэлии кэлбитэ. Кини Дьокуускайдааҕы мэдиссиинэ кэллиэһигэр үөрэнэн “Эмтиир дьыала” диэн идэни баһылаан, 2013 сыллаахха үөрэҕин бүтэрбитэ. Үөрэҕин бүтэрээт манна кэлэн үлэлии сылдьан, 2016 сыллаахха дьиэ кэргэниниин Кэбээйи улууһун Баҕадьа нэһилиэгэр көһөн барбыта. Таня идэтинэн 8-с сылын үлэлиир, онон уопуттаах эмчит буолла.
Эдэр биэлсэртэн үлэлии сылдьар эйгэҥ туһунан туох этиилээххиний диэн ыйытыыга санаатын үллэһиннэ. Кини этэринэн, балыыһа дьиэтин туруга олох мөлтөх, тымныы, улахан өрөмүөн эрэйиллэр эбит. Эбэтэр саҥа дьиэ тутуллара буоллар диэн баҕалаах. Куйаар ситимэ киирэн турар, ол гынан баран оргтиэхиньикэни аҕалалларын күүтэллэр.
— Быйыл олохтоохтор доруобуйаларын туруга куһаҕана суох, хамсык күн бүгүн нэһилиэккэ бэлиэтэммэтэ. Олунньу 26 күнүгэр 30 киһи хабыллан, учууталлар, үлэһиттэр, аҕа саастаахтар бу ыарыыны утары бастакы быһыыны ыллылар. Иккис быһыы кулун тутар 19 күнүгэр былааннанар. Эмп өттүнэн хааччыллыы үчүгэй, атыыга уонна анал эмтэнэр ыарыһахтарга туһаныллар эмтэр бааллар, — диэн кэпсээтэ биэлсэр Татьяна Григорьева.
Хаайтарыылаах, ыраах сир диэн толлубакка үлэлии кэлбит биэлсэрбитигэр бөрөлөөхтөр ситиһиини баҕарабыт.
Людмила Колесова, бибилэтиэкэ үлэһитэ
Бэлэмнээтэ Женни Стрюкова
Хаартысканы: Л.Колесова ыытта.