Дьокуускайга коронавируһу утары охсуһууга күүстээх үлэ ыытыллар. Кыахтар да бааллар. Оттон тус хоту бу дьаҥ кэлэр түбэлтэтигэр хайдах дьаһаналларый?
Биһиги уопсастыбаннай кэрэспэдьиэмит Людмила Колесова Аллайыаха Бөрөлөөҕүттэн маннык иһитиннэрдэ:
— Бөрөлөөххө коронавирус туһунан Арассыыйа уонна Саха сирин тэлэбиидэнньэтин ханаалларыттан билэ-көрө олоробут. Олохтоохтор ортолоругар аймалҕан суох. Сүрүн бородуукта баар. Дуогабар быһыытынан бородууктаны массыынанан аҕалыахтаахтар. Бибилэтиэкэ иһинэн оҕолор кинигэ уларсан ааҕалларыгар үлэ барар. Оттон дьон доруобуйаларын туругун туһунан биэлсэр Мария Гавриловна Петрова миэхэ кэпсээбитинэн, билиҥҥи туругунан, тымныйыы, дьаҥ суох. Олохтоохторго күһүн «Гриппол» оҥоһуллубут. Оскуола оҕолоро бу ый 18 күнүттэн дьиэлэригэр олороллор. Балыыһа эминэн, мэдиссиинэ мааскаларынан хааччыллыбыт. Бары ыарыыттан харыстаныыга күн аайы сүбэ-ама ыытыллар. Маны сэргэ кварцы, физраствордары туһаналлар. Чокуурдаахтааҕы киин балыыһаттан биэлсэр сүбэлэри күн аайы ыла олорор.
Дьэ, ити курдук ыраах Аллайыаха Бөрөлөөҕөр дьаҥы утары үлэ ыытыллар.
Женни СТРЮКОВА, «Саха сирэ» хаһыат, edersaas.ru
Хаартысканы Л.Колесова ыытта.