Бүлүү улууһун Лөкөчөөн нэһилиэгин олохтоҕо Максим Харлампьевы доҕотторо «Сыыр хоруола» диэн дьээбэлээн ааттыыллар. Кырдьык, кини икки сылтан бэттэх Италия сыырыттан итэҕэһэ суох бородууксуйаны оҥорон таһаарар.
Максим Харламьев:
— Мин сыыр түөрт арааһын оҥоробун – ууллубут «страккино», минньигэс «рикотта», сымнаҕас «качотта» уонна «моцарелла» диэннэри. Үүтүнэн олохтоохтор хааччыйаллар. Сүрүннээн «Тускул» хаһаайыстыба туттарар.
Сыллааҕы былаан — 580 туонна. 120 лиитэрэ үүттэн 13 киилэ сыыры ылабын. Ол аата биир лиитэрэ үүттэн 12%-на сыыр буолан тахсар. Биллэн турар, үүт сыатыттан эмиэ тутулуктаах. Саха ынаҕын үүтэ сыыры оҥорорго саамай табыгастаах. Амтана даҕаны ураты. Билигин өрөспүүбүлүкэҕэ 400-чэкэ эрэ төбө хаалбыт. Дьолго, 2013 сыллаахха Үөһээ Бүлүүттэн 5 ыанар ынаҕы уонна 1 оҕуһу аҕалбытым. Симменталь боруодатааҕар саха ынаҕын үүтүн сыата икки бүк элбэх. Саха ынаҕын тэнитэр киһи, саха сыыра аан дойдуга аатыран туспа бренд буолуон сөп. Өссө даҕаны кэҥэтэр былааннаахпын. Холобур, кытаанах сыыр биир-икки сылга тиийэ буортурбат. Мин оҥорор «качоттам» 30-60 эрэ суукка сибиэһэй турар.
Билигин мин ырыынагы кэтээн көрөбүн. Сыырым сыанатын ыараппаппын. Үксүгэр чааһынай сакаасчыттары кытта үлэлиибин. Бүлүү тэрилтэлэрэ кууһунан үлэһэн ылаллар. Кыралаан бастайааннай атыылаһааччыларданан эрэбин. Оттон Лөкөчөөн дьоно куруук атыылаһаллар. Сыыр сордун кытта араарар буоллулар. Бородууксуйабын Дьокуускайга «Айгуль» гипермаркекка таһаарар туһунан кэпсэтэ сылдьабын. Дьон ылыах этэ.
Надежда САМСОНОВА