Бүлүү умнаһын улуустарынан: миниистир сырыытын түмүгүнэн, Мэгэдьэк сылгытын бырагыраамата үбүлэнэр буолла
Бырабыыталыстыба бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев салайааччылаах министиэристибэ көһө сылдьар кэллиэгийэтэ тохсунньу 24-27 күннэригэр Бүлүү умнаһын улуустарыгар үлэлээтэ.
Кэллиэгийэ састаабыгар миниистири солбуйааччылар Татьяна Осипова, Николай Петров, Афанасий Семенов, департаменнар салайааччылара, ССТХНЧИ дириэктэрэ Айаал Степанов, тыа хаһаайыстыбатын биэдэмистибэлэрин салайааччылара сырыттылар.
Улуус ахсын — Сөбүлэһии
Министиэристибэ кэллиэгийэтэ хас улуус ахсын салааларынан хайдан, хаһаайыстыбаларга сырытта. Улуустар дьаһалталарыгар тэриллибит көрсүһүүлэргэ ааспыт сыл түмүктэрин таһаарда, үүммүт сыл соруктарын туруорда итиэннэ улуустар дьаһалталарын кытары тыа хаһаайыстыбатын сайыннарыыга бииргэ үлэлээһин Сөбүлэһиитигэр илии баттаата.
Көрсүһүүлэргэ нэһилиэктэр баһылыктара, хаһаайыстыбалар салайааччылара бэрт көхтөөхтүк кытыннылар, элбэх этиини киллэрдилэр. Холобур, Бүлүү улууһун хаһаайыстыбаларын салайааччылара үп-харчы өттүнэн чэбдигирдии бырагырааматынан көрүллүбүт көмөҕө тирэҕиринэн, хаһаайыстыбалар атахтарыгар туран эрэллэрин, көрдөрүүлэрэ быдан тупсубутун бэлиэтээтилэр. “Ампаардаах” ХЭУо сыл устата ынаҕын ахсыттан 3,7 тыһ. киилэ үүтү ыабытын, астыыр комбинаты үүтүнэн кыһыннары хааччыйарын холобурдаан туран, бырагырааманы салгыы уһатарга эттилэр. Үөһээ Бүлүү олохтоохторо ыанар ынах ахсын көмө харчы көрүллүөхтээҕиттэн саҕалаан угуттаан турар күөллэр ууларын түһэриигэ сөптөөх болҕомто уурулларын туруорустулар. Оҥхойго уонна Кырыкыйга баар саха сүөһүтүгэр сөптөөх көмө оҥоһулларыгар баҕардылар, бэтэринээрдэр өҥөлөрүн сыаната ыараханын ыйдылар.
Ньурба улууһа 119 мөлүйүөнү көрбүт!
Бүлүү эргин улуустартан биир бөдөҥнөрүгэр, Ньурба улууһугар, 147 бааһынай хаһаайыстыба итиэннэ үс бөдөҥ хаһаайыстыба — «Күндээдэ агрофирма», «Ньурба Агро МТС» аһаҕас аахсыйаламмыт уопсастыбалар уонна Степан Васильев аатынан муниципальнай бас билиилээх сылгы собуота бааллар. «Күндээдэ» агрофирма уонна «Ньурба Агро МТС» чэбдигирдии бырагырааматыгар киллэриллэн, иккис тыыннарын ыллылар. Оттон сылгы собуота уустук соҕус балаһыанньалаах, онуоха салалта уларыйа турара, үп-харчы кырыымчыга, аһылык базата кыайан тэриллибэтэ төрүөт буолаллар.
Улуус саҥа баһылыга Алексей Иннокентьев сайдыыны кыаһыылыыр кыһалҕа быһыытынан сир үлэтэ кыалла илигин, онуоха аналлаах тиэхиньикэ суоҕун, эт-үүт соҕотуопкатын иилиэхтээх-саҕалыахтаах “Байар” кэпэрэтиип уота-күөһэ суох үлэлиирин билинэр. Ханна да буоларын курдук, тыа хаһаайыстыбатын үлэтигэр каадыр тиийбэт эбит эрээри, бу салааҕа агро-оскуолалар сыал-сорук туруорунан үлэлээн эрэллэрэ эрэли саҕар.
Тыа хаһаайыстыбатын сайыннарыыга улуус быйыл алмаас дивидениттэн киирэр үптэн итиэннэ бэйэтин бүддьүөтүттэн 13 мөл. солк. көтөр фабрикатыгар сыана араастаһыытын толуйууга, 19 мөл. солк. соҕотуопка ситимин тэрийиигэ анаабыт. Маны таһынан, Алексей Михайлович быыбар иннинээҕи бырагырааматын олоххо киллэрэн, бүддьүөккэ 15 мөл. солк. көрөн, ынаҕын ахсыттан биир туоннаттан итэҕэһэ суох үүтү туттарбыт кэтэх хаһаайыстыба биир киилэ үүтүгэр 5 солкуобайы эбии төлүүр буолбут. Инньэ гынан, улуус тыа хаһаайыстыбатыгар барыта 119 мөл. солк. көрөргө былааннаабыт.
Тохсунньу 26 күнүгэр Ньурбаҕа Тыа хаһаайыстыбатын уонна ас-үөл бэлиитикэтин министиэристибэтин кэллиэгийэтин мунньаҕа ыытылынна. Манна улуус балачча элбэх боппуруоһу туруорда.
Боротокуолга киирдилэр
1. Муоһааны уонна Таланда үрэхтэр ууну халытар систиэмэлэригэр шлюз-регуляторы тутуу бырайыагын экспертизатын кыттыһан үбүлүүргэ.
2. Степан Васильев аатынан сылгы собуотун атаҕар туруорар үлэни-хамнаһы тэрийэр туһугар “Сылгыны үөрдээн иитиини сайыннарыы” бырагыраама чэрчитинэн, “Мэгэдьэк сылгытын сайыннарыы” диэн тус сыаллаах бырагырааманы салгыы үлэлэтэргэ.
3. Ньурбатааҕы көтөрү иитэр фабрикаҕа тутуллубут буойуна сыаҕын ороскуотун сорох чааһын эбэтэр сымыыты харайар ыскылаат тутуутун ороскуотун министиэристибэ уйунарыгар.
4. Хаҥалас нэһилиэгэр «Артыал» кэпэрэтиипкэ 120 ынах турар хотонун тутуутугар көмө көрүллэригэр.
Маны таһынан, 2018-2020 сс. сир үлэтин сайыннарыы улуустааҕы бырагырааматын өйүүргэ, чэбдигирдии бырагырааматын иккис түһүмэҕэр «Күндээдэ агрофирма» уонна “Ньурба-Агро МТС” ААУо-лары киллэрэргэ этилиннэ. Онон кэллиэгийэ мунньаҕа Ньурба улууһугар төрүт салаалары сайыннарыыга ити курдук үтүө түмүктэрдээх буолан ааста. Көһө сылдьар кэллиэгийэ үлэтэ тохсунньу 27 күнүгэр Сунтаар улууһугар Тыа хаһаайыстыбатын уонна ас-үөл бэлиитикэтин министиэристибэтин Күнүнэн түмүктэннэ.
Екатерина ЗАХАРОВА, министиэристибэ пресс-сулууспата, edersaas.ru. сатка анаан.
Хаартыскаҕа: Бырабыыталыстыба бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев Октябрьскай нэһилиэк баһылыга Семен Корякины, Ньурба улууһун баһылыга Алексей Иннокентьевы кытары.