Олунньу 23 күнүгэр Бүлүү II Күүлэтигэр аныгы амбулатория аһылынна. Амбулатория дьиэтэ фельдшер-акушер пуунун моделынан оҥоһуллубут, аныгы ирдэбиллэргэ, үрдүк медицинскэй-санитарнай көмөнү оҥорорго эппиэттиир. Фельдшер кэбиниэтэ, күнүс сытан эмтэнэр, бастакы көмөнү оҥорор хостор ыарыһахха уонна үлэлиир исписэлиискэ табыгастаахтар.
Саҥа амбулатория аһыллыыта 500-тэн тахса нэһилиэнньэлээх II Күүлэт с. хас биирдии олохтооҕор уонна улуус доруобуйатын харыстабылын үлэһиттэригэр улахан үөрүүлээх түгэнинэн буолар. Тоҕо диэтэххэ, урут амбулатория 1991 с. тутуллубут эргэ мас дьиэҕэ олорон үлэлээбитэ. Төһө да хаста да саҥарда, өрөмүөннүү сатаабыттарын үрдүнэн дьиэ эркинэ уонна акылаата хамсаабыта. Онон, саҥа амбулаторияны тутар боппуруос Бүлүү улууһун дьаһалтатыгар сытыытык турбута. СӨ Доруобуйа харыстабылын министиэристибэтин өйөбүлүнэн саҥа дьиэ баара-суоҕа 6 ый иһигэр тутуллан, үлэҕэ киирдэ.
Амбулаторияны үөрүүлээхтик аһыыга улуус баһылыгын социальнай боппуруостарга солбуйааччы Венера Тихонова, Күүлэт с. баһылыга Светлана Игнатьева, Бүлүү улууһун киин балыыһатын кылаабынай бырааһа Егор Григорьев, кылаабынай бырааһы солбуйааччы Алевтина Кондакова, кылаабынай бырааһы тэрээһин-методическай үлэҕэ солбуйааччы Акулина Семенова уонна олохтоох нэһилиэнньэ кытыннылар.
ЫСПЫРААПКА:
2014 с. өрөспүүбүлүкэ бырабыыталыстыбата 2018 сылга диэри 100 фельдшер-акушер пуунун тутар туһунан дьаһалы ылыммыта.
Онон, 2014 сыл кэнниттэн Усуйаанаҕа, Хаҥалас улууһун Төхтүр с., Ньурба улууһун Малдьаҕар с., Мэҥэ Хаҥалас улууһун Ороссолуода, Тиэлиги, Матта, Томтор сэлиэнньэлэригэр, Үөһээ Дьааҥы улууһун Чөрүмчэ с., Уус Алдан улууһун Бээрийэ с., Кэбээйи улууһун Кальвица с., Сунтаар улууһун Аллаҥа с., Уус Маайа улууһун Күпсү с., Чурапчы улууһун Үрүҥ Күөл, Төлөй сэлиэнньэлэригэр, Нам улууһун Граф биэрэгэр уо.д.а. тутуллан үлэҕэ киирбиттэрэ.
Надежда ЕГОРОВА, «Саха сирэ» хаһыат, edersaas.ru