Бүлүү улууһун Дьөккөн нэһилиэгэр биллиилээх политическэй деятель, большевик, революционер Степан Филиппович Гоголев төрөөбүтэ 125 сылыгар аналлаах бүтүн өрөспүүбүлүкэтээҕи алын сүһүөх кылаас учууталларын икки ардыларыгар «Мин идэм – сырдык инникилээх» диэн куонкурус буолан ааста.
Куонкуруска уопсайа 14 улуустан эдэр учууталлар муһуннулар. Тэрээһин туһунан Сэбиэскэй сойуус дьоруойа Николай Алексеевич Кондаков аатын сүгэр Дьөккөн нэһилиэгин орто оскуолатын дириэктэрэ Егор Егорович Петров санаатын үллэһиннэ:
— Биһиги бу улахан тэрээһини бастакыбытын тэрийдибит. Гоголев 1919 с. сүүрбэ икки саастааҕар начаалынай училищены арыйбыта. Ону кэриэстээн, үйэтитэр соруктаах эдэр дьоҥҥо маннык тэрээһини ыытыахха диэн Бүлүү улууһун үөрэҕириитигэр бырайыак киллэрбиппит. ИРО ИПК халандаарынай бырагырааматыгар киллэрэммит бэлэмниир үлэлэри тэрийэн куонкуруспутун дьэ этэҥҥэ үрдүк таһымнаахтык ыыттыбыт. Бастакы куонкурус буолан сүрдээҕин долгуйдубут, түбүгүрдүбүт. Онуоха оскуолабытыгар уһун сылларга үлэлээбит бэтэрээн учууталларбыт дьиэ кэргэттэрэ тэрээһиммитин өйөөн анал бириистэрин туруордулар. Ону сэргэ, Ил Түмэн дьокутаата Александр Васильевич Гоголев бэйэтин үбүнэн көмө оҥорбута. Онон бары кыттыбыт, тэрээһиммитигэр көмөлөспүт дьоммутугар махталбыт муҥура суох, чуолаан үөрэх бырабылыанньатыгар, нэһилиэкпит аҕа баһылыгар Егор Иванович Степановка, биир дойдулаахтарбытыгар биир сомоҕо буолан тэрийсибиттэригэр оскуола кэлэктиибин аатыттан махталбытын биллэрэбит. Инникитин даҕаны бу курдук биир сүбэнэн улахан тэрээһиннэри тэрийиэхпит диэн эрэллээхпит. Эдэр учууталлар мустан уопут атастаһа, таһымнарын үрдэтэ, бэйэлэрин тургута ыраахтан-чугастан мустан кэлбиттэрэ үөрдэр.
Махталлаах идэ кыайыылаахтара
Учуутал сырдыкка угуйар, киэҥ билии аартыгар арыаллыыр сүрүн идэ. Бу Дьөккөн нэһилиэгэр ыытыллыбыт улахан тэрээһиҥҥэ эдэр учууталлар маастар-кылаас ыытан, бэйэлэрин бырайыактарын көмүскээн, бэйэлэрин билиһиннэрэн, ону сэргэ ток-шоу ыйытыыларыгар тута хоруйдаан үрдүк таһымнарын көрдөрдүлэр. 14 эдэр учууталы 15 экспиэр сыаналаата.
Ол курдук Степан Гоголев аатын сүгэр Дьокуускайдаа5ы педагогическай кэллиэс, Бүлүү куоратын үөрэҕириитин салалтатыттан уонна нэһилиэк учууталлара дьүүллүүр сүбэҕэ кыттыыны ыллылар. Икки күннээх тыҥааһыннаах киирсии, долгутуулаах күрэхтэһии кэнниттэн түмүк тахсан «Педагогическай саҕалааһын» аакка Бүлүү улууһун Кыһыл Сыыр эдэр учуутала Лаурита Егоровна Семенова тигистэ. «Идэҕэ ситиһиилээх айан» анал ааты Татьяна Петровна Протодьяконова 1 Дьөппөн нэһилиэгин учуутала, «Айар тахсыы» Любовь Степановна Васильева Бүлүү улууһун Бөтүҥ нэһилиэгин учуутала, «Дууһа баайа» (Щедрость души) — Надежда Михайловна Степанова (Бүлүү улууһун Мастаах орто оскуолатын учуутала), «Үөрэх бастыҥ бырайыага» — Марианна Николаевна Николаева (Мэҥэ Хаҥалас улууһун Бэстээх орто оскуолатын учуутала), «Идэҕэ киэҥ билиилээх» — Анна Альбертовна Федорова (Бүлүү улууһун Чочу нэһилиэгин учуутала), «Үөрэнээччилэр билиниилэрэ» — Айгыына Филиповна Игнатьева (Бүлүү улууһун Халбаакы нэһилиэгин оскуолатын учуутала), «Бастыҥ уруок» — Регина Анатольевна Голомарева (Өлүөхүмэ улууһун Саҥыйахтаах оскуолатын учуутала), «Мин идэҕэ булумньум» — Елизавета Александровна Ощепкова (Өлүөхүмэ улууһун 2 Нөөрүктээйи оскуолатын учуутала), «Информационнай грамотность» — Сардаана Николаевна Федорова (Ньурба улууһун Ньурбатааҕы 3№-дээх оскуола учуутала), «Методическай компетенция» — Алена Дмитриевна Корякина (Покровскай куоратын 3№ оскуолатын учуутала) тигистилэр. Үһүс истиэпэннээх лауреат үрдүк ааты Бүлүү улууһун Хампа нэһилиэгин учуутала – Елена Николаевна Олесова, иккис истиэпэннээх лауреат үрдүк аатын Хаҥалас улууһун Хачыкаат оскуолатын учуутала Юлия Петровна Прокопьева, онтон «Мин идэм – сырдык инникилээх» куонкурус муҥутуур кыайыылааҕынан Бүлүү улууһун Дьөккөн орто оскуолатын учуутала Алина Петровна Огудова таҕыста.
Ульяна ЗАХАРОВА, edersaas.ru
Хаартыскалар Бүлүү улууһун Дьөккөн орто оскуолатын тус архыыбыттан туһанылыннылар.