Бүлүү улууһун баһылыга сэрии бэтэрээннэригэр массыына бэлэхтээтэ
Бүгүн социальнай ситимнэринэн үөрүүлээх сонун тигинээн кэллэ. Ол курдук, Бүлүү улууһун баһылыга Сергей Винокуров Аҕа дойду сэриитин икки бэтэрээнигэр Николай Афанасьевка, Яков Григорьевка массыына бэлэхтээтэ.
— Күн бүгүн Бүлүү улууһугар икки сэрии бэтэрээнэ олорор. Аҕа дойду сэриитин кыттыылааҕа РСФСР оскуолаларын үтүөлээх учуутала, норуот учуутала, өрөспүүбүлүкэҕэ агро-оскуоланы тэрийбит Николай Иванович Афанасьев уонна Илин, Арҕаа сэриилэр кыттыылааҕа, соторутааҕыта “Гражданскай килбиэн” бэлиэнэн наҕараадаламмыт Яков Петрович Григорьев.
Кыайыы 75 сылын көрсө бэтэрээннэрибитигэр массыыната бэлэхтиэххэ диэн быһаарбыппыт. Бэҕэһээ икки УАЗ-патриот массыына кэллэ, бүгүн туттардыбыт. Уонна бырааһынньыгынан сибээстээн, 174 тыыл бэтэрээнигэр 10-нуу тыһыынча солкуобай харчынан, сэрии оҕолоругар барыларыгар 3-түү тыһыынча солкуобай харчынан көмө оҥордубут, өйдөбүнньүк бэлэхтэри туттардыбыт.
Биһиги бүгүҥҥү олохпут туһугар уоттаах сэриини ортотунан ааспыт бэтэрээннэрбитин, кыайыы иһин бэйэлэрин кылааттарын киллэрсибит дьоммутун өрө тутар ытык иэспит”, — диэн Бүлүү улууһун баһылыга Сергей Винокуров Эдэр саас саайтка санаатын үллэһиннэ.
Итини таһынан, улуус баһылыга тыыл бэтэрээннэригэр анаан 12 кыбартыыралаах дьиэни тута сылдьалларын иһитиннэрдэ. 174 тыыл бэтэрээнин барытын чугастааҕы сылларга дьиэнэн хааччыйыахтаахпыт диэн үөрүүлээх сонуну эттэ.
https://www.instagram.com/p/B_7DQdToVP2/?igshid=14muidl46o726
Людмила ПОПОВА, edersaas.ru