«Сахаагроплем» судаарыстыба бүддьүөтүн тэрилтэтин исписэлиистэрэ Татьяна Протопопова уонна Наталья Неустроева бу күннэргэ Бүлүү улууһун Чинэкэтигэр, Сэтэминнээх сайылыкка үс техник-осеменаторы үөрэттилэр.
edersaas.ru
Кинилэр ынаҕы искусственнайдык сиэмэлээһин саҥа хайысхаларын тустарынан кэпсээтилэр, «Alfa Vision» диэн саҥа тэрилинэн туттарга үөрэттилэр, эрдэ сиэмэлэммит ынахтартан хаһы даҕаны бэрэбиэркэлээтилэр.
Үөрэтии кэнниттэн улуустааҕы тыа хаһаайыстыбатын департаменын начальнига Павел Иннокентьевы, бэтэринээрийэ управлениетын начальнига Лидия Иванованы уонна тыа хаһаайыстыбатын исписэлиистэрин кытары көрсөн, исскусственнайдык сиэмэлээһин былаанын толоруу, каадырынан хааччыллыы, идэни үрдэтии, саҥа сиэмэһиттэри үөрэтии тустарынан кэпсэттилэр.
Быйылгы улуус үрдүнэн 986 ынах сиэмэлэниэхтээҕиттэн, былаан 35 % толоруллан иһэр. Күн бүгүн алта нэһилиэккэ сэттэ техник-осеменатор дуогабар түһэрсэн үлэлиир. Кинилэртэн биирдэстэрэ идэтинэн бэтэринээр эбит. Улууска 5 027 ыанар ынах баар. Ааспыт сылга тэҥнээтэххэ, «Сахаагроплем» сиэмэ матырыйаалын харайар убаҕас азоту сөптөөхтүк хааччыйбыт. Онон техник-осеменатордарга элита оҕустар сиэмэлэрэ тиэрдиллбит, Дьюар иһиттэрэ уонна сиэмэһит анал суумкалара бэриллибит. Улууска ынах сүөһүнү искусственнайдык буоһатыыга үлэ салҕанар, нэһилиэнньэттэн сайаапка хомуллар диэн Бэтэринээрийэ департамена иһитиннэрэр.
Раиса Сибирякова, «Саха сирэ» хаһыат, edersaas.ru