Бэҕэһээ, кулун тутар 10 күнүгэр, Бүлүү улууһун Тааһаҕар бөһүөлэгин Н.Н.Каратаев аатынан оскуола саҥа дьиэтин үөрүүлээх аһыллыытын сиэрэ-туома ыытылынна.
Оскуола тутуута 2016 сылтан саҕаламмыта. Уопсайа 3,4 тыһыынча квадратнай миэтэрэ иэннээх, 100 миэстэлээх. Оскуола «АЛРОСА» АХ аахсыйатын барыһын суотуттан Бүлүү оройуонун бүддьүөтүгэр киирбит үбүнэн тутулунна.
Оскуола аһыллыытыгар вице-премьер Сергей Местников өрөспүүбүлүкэ оҕолоро үөрэх, билии таһынан, чэгиэн доруобуйалаах буолуохтаахтар диэн бэлиэтээн эттэ.
Тааһаҕар бөһүөлэгин орто оскуолата РФ уонна Саха сирин үтүөлээх юриһын, үһүс кылаастаах Юстиция сүбэһитин Николай Нифонтович Каратаев аатын сүгэр.