Билигин өрөспүүбүлүкэ үрдүнэн сүрүн болҕомто ойуур баһаарын умуруорууга уонна коронавирус дьаҥын бохсууга ууруллар. Ол эрээри, сайыммыт барахсан күһүнүнэн солбуллара чуһаатар чугаһаан иһэр. Онон улуустарга хомунаалынай хаһаайыстыба хайысхатынан кыстыкка бэлэмнэнии күүскэ бара турар.
Улуустартан Бүлүү улууһун таарыйар буоллахха, 2021-2022 сыллааҕы оттук сезонугар бэлэмнэнии былаан быһыытынан барар. Билиҥҥи туругунан өрөмүөн былааныттан 60 %-нын кээрэппиттэр.
«Бу күннэргэ Балаҕаччы уонна Тылгыны нэһилиэктэрин хочуолунайдарыгар оборудованиелары уларыттыбыт. Бүлүү куоракка «ПАК» эбийиэгэр хочуолу уларытыы уонна ититэр ситими саҥардыы барар. «Киин» хочуолунайга 30 м уһуннаах буруо тахсар турбатын таҥа сылдьабыт. Кыһыл-Сыыр бөһүөлэгэр 2 №-дээх хочуолунайга ыытыллыахтаах өрөмүөнү үмүрүттүбүт, билигин уунан хааччыйар ситими уларытыы барар. Лөкөчөөҥҥө ититэр ситими итиини тутар матырыйаалынан бүрүйэн бүтэрдибит», — диэн ОДьКХ Бүлүүтээҕи филиалын дириэктэрэ Андрей Лобашев иһитиннэрдэ.
Итини тэҥэ, Лөкөчөөҥҥө саҥа кыбаарталга тутуллуохтаах модульнай хочуолунай бырайыага оҥоһулла сылдьар. Саамай сүрүнэ, ити кыбаарталга баар дьиэлэргэ ититэр ситим тардыллыбыт, олору итиини тутар матырыйаалларынан бүрүйбүттэр.