Кыһын хаар халыҥ буолан уонна саас күүскэ ардаан, Бүлүү улууһугар 16 нэһилиэк ходуһата ууга сытар буолан, оттооһуҥҥа уустуктары көрүстүлэр.
edersaas.ru
Холобур, I Күүлэт нэһилиэгэ оттуур сирин 70 % ууга былдьаппыт, бу курдук ордук улаханнык эмсэҕэлээбиттэр – Хаҕын (ходуһа 52 %), Халбаакы (ходуһа 55 %) уонна Лөкөчөөн (ходуһа 49 %). Бу түөрт нэһилиэккэ олохтоох суолталаах ыксаллаах быһыы-майгы эрэсиимэ биллэриллибит.
Нэһилиэктэр субуотунньук тэрийэн, хоруу хорон, ууну түһэриигэ күүскэ үлэлии-хамсыы сылдьаллар. Улуус үлэһит дьоно ити курдук ууну түһэрэ-түһэрэ оттоон, кыстыыр отторун 80 %-ын булунарга суоттаналлар.
Мелиорация үлэтин күүһүрдэр, курааннаабыт улуустартан экскаватордары уларсан, хоруулары ыраастааһыны түргэтэтэр наада буолбут. Бүлүү курдук ходуһаларын ууга ылларбыт кыһалҕалаах Кэбээйи улууһун Мукучу эргин нэһилиэктэрэ уонна Горнай улууһа бааллар, онон Тыа хаһаайыстыбатын министиэристибэтэ ууну түһэрии, уопсайынан мелиорация боппуруоһугар сотору кэминэн туспа мунньахтыаҕа.
Раиса Сибирякова, «Саха сирэ» хаһыат, edersaas.ru
Хаартыскаҕа Николай Куприянов түһэриилэрэ.