Маны аах Тыа хаһаайыстыбата

Бүлүү улууһа окко былаанын 78 % толордо

Быйылгы курдук хаһааҥҥытааҕар да кураан, элбэх ойуур баһаардаах сайын бүлүүлэр хайдах оттуулларын туһунан кэпсиир Бүлүү улууһун тыатын хаһаайыстыбатын департаменын салайааччы Павел Иннокентьев.

Быйыл биһиги улууска 27340 туоннаны оттуур былаан тиэрдиллибитэ. Атырдьах ыйын 21 күнүнээҕи туругунан, 21 444 туоннаны оттоон, былааммытын 78 % толордубут. Сиилэскэ былааммыт 1300 туонна эрээри, курааннаан, 800 туоннаны бэлэмниэхпит диэн сабаҕалааһын баар. Сиилэскэ анаан ыһыыбыт үүнүүтэ мөлтөх, кэлиҥҥи күннэргэ ардаатаҕына ситиһэ сатыыра дуу? Сенажка эмиэ итинник балаһыанньа – былаанынан көрүллүбүт 640 туонна оннугар 320 туоннаны бэлэмниэхпитин сөп диэн суоттанабыт. Сиигирдиэ, ардыа диэн күнү-дьылы кэтэһэргэ эрэ тиийэбит.


Саппааска анаан 22 мобильнай биригээдэ 1379 туонна оту оттоотулар. Кинилэр барыта 2740 туоннаны саппааска оттуохтаахтар. Баһаарга ылларбыт, от үүммэтэх Горнай улууһугар 500 туоннаны оттуурга дуогабардаһан олоробут.

Нэһилиэктэринэн ыллахха, Бороҕоҥҥо ойуур баһаарыттан сылтаан бытаарыы таҕыста. Халлаан туран биэрдэҕинэ, ситиһиэхтэрэ. Сыдыбыл эҥэр үүнүү мөлтөх, оннооҕор кэтэх ыаллар от атыылаһарга сайаапка түһэрдилэр. «Халбаакы» кэпэрэтиип 250 туонна оту көрдүү олорор. «Бөтүҥ» ПК эмиэ сыл аайы курааннаан 100 т от атыылаһарга күһэллэр, уоннааҕы хаһаайыстыбаларга, нэһилиэктэргэ от үүнүүтэ этэҥҥэ диэххэ сөп. Курааҥҥа ылларбыт хаһаайыстыбалар бэйэлэрин истэригэр хантан от ылалларын кэпсэтэллэр, сүбэлэһэллэр. Биһиги оттооһуҥҥа хаһаайыстыбалар бэйэлэрин хааччына сатыылларыгар үлэни туһаайа олоробут.

Бүлүүттэн Николай Куприянов.

0
0
Telegram @edersaas20