Бүлүү Тылгынытын дьоно төрөөбүт нэһилиэктэригэр дьоһун бэлэҕи ууннулар...
Олох-дьаһах

Бүлүү Тылгынытын дьоно төрөөбүт нэһилиэктэригэр дьоһун бэлэҕи ууннулар

«Дойдум дьоно дууһабар аанньал курдук ыалдьыттар…» диэн ырыаҕа ылланар эрэ буолбатаҕын, биир дойдулаахтар түмсэр киэһэлэригэр сылдьан илэ итэҕэйдим. Бээтинсэ күн Үүнэр көлүөнэ тыйаатырыгар Бүлүү улууһун Тылгыны нэһилиэгин олохтоохторо Дьокуускай куоракка олорор биир дойдулаахтарын кытта көрсүһүүлэрэ буолла. Тылгыны олохтоохторо эһиил 2018 сылга төрөөбүт нэһилиэктэрин 100 сыллаах үбүлүөйүн бэлиэтииргэ олохтоохтук бэлэмнэнэллэр.

 

Елена ПОТОЦКАЯ, «Саха сирэ» хаһыат, https://edersaas.ru

Тылгыны сэбиэскэй кэм саҕана «Күүлэт» сопхуос киинэ этэ. Онон тыа хаһаайыстыбатын салаатынан сайдан олоробут. Оттуур сирбит дэлэй буолан, олохтоох боородууксуйаны оҥорон таһаарар үлэлээх «ИП»-лар үгүстэр. Бу салааҕа үлэһэргэ социальнай контракт ньыматынан дьону үлэлээх оҥорорго дьулуһабыт. Икки хотону тутан үлэҕэ киллэриэхпит. Кэрэхсэбиллээҕэ, саҥа саҕалаан эрэ фермердэрбит олоххо сонун көрүүлээхтэр. Нэһилиэкпит кэскиллээх былааныгар водопровод тутуута баар. Култуура министиэристибэтиттэн 400  тыһ. солк. граҥҥа тиксибиппит. Аны авиабылаһааккабытын саҥардыахпыт. Күөллэрбитигэр быраҥааттаны элбэтиигэ аукцион ыытыллан эрэр.  2018-2019 сылларга оҕо саада тутуута былааҥҥа киирбитэ. Ону таһынан 2022 с. саҥа оскуола тутуллуохтаах. Онон кэскиллээх былаан үгүс, — диэн кэпсиир нэһилиэк баһылыга Иван Тимофеев.

Кэнсиэр кэмигэр быыстапкатын тэрийбит Мария Степанова — Ырыа Маарыйа баһылык Иван Тимофеевтыын

Тылгыныттан төрүттээх дьон нэһилиэкпит олоҕун-дьаһаҕын, ситиһиитин, кыһалҕатын күннээҕинэн билсэ олоробут. Онон  үбүлүөйгэ эрдэттэн бэлэмнэнэн, тыа сиригэр да, куоракка да биир хайысхалаах үлэни ыытабыт, — диэн санаатын үллэстэр Дьокуускай куоракка Тылгыны нэһилиэгиттэн төрүттээх дьон түмсүүлэрин чилиэнэ Татьяна Николаева.

Тылгыны нэһилиэгин түмсүүтүн тутаах киһиэ Татьяна Николаева быыстапканы сэргиир

Дьаһалта баһылыга Иван Тимофеев кэпсииринэн, нэһилиэккэ 12 уопсастыбаннай тэрилтэ көхтөөхтүк үлэлиир.  «Эрчим» диэн эр дьон ансаамбыла биир дойдулаахтарын куттарын туппут уопсастыбыннай түмсүүттэн куорсун анньынан, аны «Дьүрүскэн» диэн уолаттар ансаамбыллара үүнэн таҕыста. Онон ыал аҕалара ыччаттарын үтүөҕэ уонна сырдыкка угуйан: «Тылгынылар дуо?» — дэтэргэ киэн туттууну сахтылар. Кырдьык да, «Эрчим» ансаамбыл төрөөбүт Тылгыныларын ахтан кэлбит дьоҥҥо дойдуларын туһунан ыллаан, дууһаларын кылын таарыйдылар.

«Эрчим» ырыа ансаамбыла былааһы ылла

Тылгынылар нэһилиэктэрин 100 сыллаах үбүлүөйүгэр бэлэмнэнэн, былырыын кэлэн кэнсиэрдээн, музыкальнай аппаратура ылыммыттар. Быйыл 35 киһилээх кэлбиттэр. Аатырбыт ырыаһыттарын, сыана бэтэрээнин Мария Васильеваны-Ырыа Маарыйаны уонна саҥа тахсан эрэр, сотору кэминэн аатын ааттатыах ыччаттарын Иоганн Матвеевы тыйаатыр сыанатыгар ыллатан, көлүөнэ ситимэ быстыспатын көрдөрдүлэр. Быйылгы кэнсиэрдэриттэн киирбит үбүнэн кулууптарыгар саҥа кириэһилэ атыылаһар былааннаахтар. Ол санаалара туолла. Кэнсиэртэн 81 тыһ. солк. хомулунна.  Саала  иһиттэн ыаҕыйалаах кыыс 37 тыһ. 200 солк. хомуйда. Онон тылгынылар төрөөбүт нэһилиэктэрин үбүлүөйүгэр дьоһун бэлэҕи утары ууннулар.

Көрөөччүлэр кэнсиэри төлөпүөҥҥэ быыстала суох усталлар.

Дойдуларын ахтар-саныыр дьон бу күн бэйэ-бэйэлэрин көрсөн, бэрт истиҥник кэпсэттилэр, санаалыын көнньүөрдүлэр.

Ахтыспыт дьон маннык көрсүһэллэр

Биир дойдулаахтарыгар: «Эһиил эмиэ кэлээриҥ. Күүтүөхпүт!» — диэн санааларын тиэртилэр. Тылгынылар курдук биир дойдулаахтар көрсүһүүлэриттэн кыымтан кулуһун саҕыллан, төрөөбүт дойдуга истиҥ сыһыан, өйөбүл үөскүүрэ — үтүө холобур.

 

Учууталларын Евдокия Гаврильеваны кытта

 

Елена ПОТОЦКАЯ, «Саха сирэ» хаһыат, https://edersaas.ru

 

 

4
1

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

один × 1 =