Бүлүү улууһун Тылгыны нэһилиэгин баһылыга Егор Иванов Ыччат сылын тэрээһиннэрин үбүлээһиҥҥэ киллэрбит этиилэрин бэрэстэбиитэллээх уорган дьокутааттара 2021 сыл ахсынньы 30 күнүнээҕи сессияларыгар биир санаанан ылыммыттара.
Бу туһунан уопсастыбаннай кэрэспэдьиэммит Христина Васильева бу курдук кэпсиир:
— Тылгыны үгүс сылларга Бүлүү улууһугар да, өрөспүүбүлүкэҕэ даҕаны «страховой» дэнэр саппаас оту бэлэмниир биир суолталаах дьарыктаах нэһилиэгинэн буолар. Онно сүрүн төһүү күүһүнэн биһиги ыччаттарбыт буолаллар. Оҕолорбут төрөөбүт дойдуларыгар олус бэриниилээхтэр, бары уопсастыбаннай үлэҕэ көхтөөх дьон.
Олохтоох дьаһалта үлэтин биир сүрүн соруга — нэһилиэккэ ыччаты олохсутуу. Ол инниттэн баһылык Егор Иванов 2020 сылтан эдэр ыал дьиэ туттарын өйүүр анал бырагырааманы үлэлэтэр. Икки сыл устата ыытылла турар сонун хамсааһын үтүө түмүктээх. Ол курдук, икки ыал саҥа туттубут дьиэлэригэр киирдилэр.
Сэттэ ыал 2022 сылга саҥа дьиэҕэ киирээри түбүгүрэ сылдьаллар. Бу ыччат сэргээбит бырагыраамата салгыы 2026 сылга диэри үлэлиэҕэ.
2022 сылга Саха АССР төрүттэммитэ 100 сыллаах үбүлүөйүгэр уонна Ийэ сылыгар эдэр дьиэ кэргэннэри өйүүр сыалтан Тылгыныга төрөөбүт хас биирдии «үйэ оҕотугар» олохтоох бүддьүөттэн 50 тыһыынча солкуобайдаах анал көмөнү оҥоруохпут. Бу сонун сүүрээн Бүлүү улууһугар бастакынан биһиги нэһилиэкпитигэр олоххо киириэҕэ.
Елена ПОТОЦКАЯ, «Саха сирэ» хаһыат.
Хаартыска — Христина Васильева тиксэриитэ.