Бүлүү улууһун Тылгыны нэһилиэгэр ойуур баһаарыттан сэрэтэр үлэ былааннаахтык барар.
Баһылык Егор Иванов олохтоох дьаһалта салайааччытын быһыытынан минерализованнай балаһаны оҥотторо сылдьар. Онно түөрт биигээдэ тэриллэн үлэлиир. Былаан быһыытынан биригээдэлэр үлэлэрин муус устарга бүтэриэхтээхтэр.
Ойуур баһаарыттан сэрэхтээх буолууга, нэһилиэнньэҕэ ойуур баһаарыттан сылтаан куттал суоһаабатын туһугар баһылык Егор Иванов улахан болҕомтотун уурар.
Бу туһунан биһиги уопсастыбаннай кэрэспэндьиэммит Христина Васильева бу курдук кэпсиир:
— Быйыл ыксаллаах быһыы-майгы кэмигэр туттуллар анал «Сокол» вездеход ыллыбыт, уу кутар саҥа массыыналанныбыт. Ааспыт сылларга УАЗ-пиэрмэр, квадрокоптер (беспилотник), мобилизацияҕа дьону таһарга прицеп икки көрүҥүн, булуук, бензопила уо.д.а. ылбыппыт. Нэһилиэккэ 60 ыалга баһаартан харыстанар АДПИ туруордубут. Быйыл өссө эбии 60 ыалга ылыахпыт. Аны билигин ДПК (Добровольнай пожарнай команда) уолаттарын анал таҥастарыгар, туттар тэриллэригэр болҕомто ууруллуоҕа. Сайыҥҥы өттүгэр баһаар буолар түбэлтэтигэр водопровод гидраннара туттуллуохтаахтар. Муус устар устата былаан быһыытынан икки баһаарынай үөрэх ыытыллыаҕа: биирэ — ДПК уолаттара, эр дьон мобильнай буолууларыгар аналлаах, иккиһэ — «Обьекка — ЧС» үһүйээнинэн ыытыллыаҕа.
2021 сылга баһаарга мобилизацияламмыт уолаттар бары (30 киһи) Ил Дархан Айсен Николаев «2021 сылга ойуур баһаарын кытта охсуһаччы» диэн анал бэлиэни туттарбыттара.
Елена ПОТОЦКАЯ, «Саха сирэ» хаһыат.