Бүлүүттэн төрүттээх судаарыстыбаннай деятеллэргэ аналлаах историческай саала арылынна

Тохсунньу 15 күнүгэр М.Н.Жирков аат. Култуура Дыбарыаһыгар «Бүлүүттэн төрүттээхтэр – Саха сирин государственнай деятеллэрэ» диэн үөрүүлээх быһыыга-майгыга историческай саала арылынна.

Биир үйэ анараа өттүгэр саха чулуу уолаттара Платон Ойуунускай, Максим Аммосов, Исидор Барахов, Степан Аржаков уо.д.а. Саха автономнай сэбиэскэй социалистическай өрөспүүбүлүкэтин тэрийиигэ бары сыраларын уурбуттара.
Бүлүүлэр саха автономиятын төрүттэспит биир дойдулаахтарынан – Степан Максимович Аржаков, Степан Филиппович Гоголев, өрөспүүбүлүкэ сайдарыгар улахан кылаатын киллэрбит Гавриил Иосифович Чиряев ааттарынан киэҥ тутталлар, үйэтитэллэр
Историческай сааланы арыйар кыһыл лиэнтэни Бүлүү улууһун дьаһалтатын баһылыга Сергей Винокуров, оройуоннааҕы депутаттар Сэбиэттэрин бэрэссэдээтэлэ Гаврил Корякин, Бүлүү улууһун ыччатын Сэбиэтин бэрэссэдээтэлэ Иван Митясов быстылар.
Улуус дьаһалтатын баһылыга Сергей Винокуров Саха сиригэр, Арассыыйаҕа киэҥник биллибит биир дойдулаахтарбытын өрөспүүбүлүкэни төрүттэспит Степан Аржаков, государственнай деятель Степан Гоголев, 17 сыл ССКП обкомун бастакы секретарынан үлэлээбит Гавриил Чиряев, бастакы композитор Марк Жирков, ССРС норуодунай учуутала Михаил Алексеев, буойуннар, ССРС Геройдара Н.С.Степанов, А.А.Миронов, Н.А.Кондаков, Саха сиригэр бастакы Үлэ Геройа Петр Староватов уо.д.а. ааттарын киэҥ тутта ааттаата уонна култуура, үөрэх эйгэтин үлэһиттэригэр Бочуоттаах кырааматалары, махтал суруктары үөрүүлээх быһыыга-майгыга туттарда.
Бу дьоро киэһэ Максим Аммосов дойдутуттан – Намтан улуус баһылыга Юрий Слепцовтан, Ем. Ярославскай аат. Хоту норуоттар култуураларын историяларын Саха сиринээҕи холбоһуктаах түмэлин дириэктэрэ Николай Бугаевтан, Степан Максимович Аржаков дьонноруттан эҕэрдэ телеграммалар ааҕылыннылар.
Мустубут дьону оройуон Сэбиэтин бэрэссэдээтэлэ Гаврил Корякин, куорат дьаһалтатын баһылыга Нюргустан Афанасьев, Дьөккөнтөн норуот хаһаайыстыбатын үтүөлээх үлэһитэ Альбина Ионова,  Тааһаҕар нэһилиэгин баөылыга Семен Каратаев, Харбалаах нэһилиэгин баһылыга Константин Платонов билиилээх биир дойдулаахтарын тустарынан ахтан-санаан аастылар, историческай чахчылары билиһиннэрдилэр, кинилэр саха автономиятыгар киллэрбит кылаттарын бэлиэтээтилэр.
Историческай саалаҕа бастакы экскурсияны Герой Н.С.Степанов аат. Бүлүү куоратын 3 №-дээх оскуолатын историяҕа учуутала, Бүлүү улууһун ыччатын Сэбиэтин кыттыылааҕа Сардана Егорова ыытта.
Быйылгы 2022 сыл Бүлүү улууһугар биир дойдулаахтарбыт – Бүлүү Чулуу дьонун сылларынан биллэриллибитэ. Биллэриллибит сылы кытта тэҥҥэ Бүлүүттэн төрүттээх государственнай деятеллэргэ аналлаах историческай саала дьүөрэлии тутуллан арыллыыта инникигэ саҕахтары саҕар, кынаттыыр. Бүлүүттэн төрүттээх государственнай деятеллэргэ аналлаах историческай саала арыллыыта биир дойдулаахтарбыт ааттарын өссө үйэтитэргэ, суолта биэрэргэ улахан хардыы буолар.

Николай КУПРИЯНОВ.