Бүлүүтээҕи хор билигин дойдубут тэбэр сүрэҕэр Москва куоракка үлэлиир.
Бэҕэһээ, муус устар 27 күнүгэр, Петр Чайковскай аатынан консерватория аччыгый саалатыгар Саха АССР төрүттэммитэ 100 уонна биллиилээх композитор Марк Жирков төрөөбүтэ 130 сылларыгар аналлаах кэнсиэргэ Бүлүүтээҕи хор (салайааччы Ольга Корякина) “Саргы дьаалы” диэн ырыаны үрдүк таһымнаахтык толорон, көрөөччүлэр махталларын ылла.
Кэнсиэр кэнниттэн Чайковскай аатынан консерватория ректора Александр Сергеевич Соколов олус бэртээхэй кэнсиэр буолла диэн махтанан туран, Бүлүүтээҕи хорга рояль бэлэхтээн, биир дойдулаахтарбытын олус диэн соһутта да, үөртэ да. Түгэнинэн туһанан, Бүлүүтээҕи хор кэлэктиибигэр улуус историятыгар киирэр үтүө бэлэхтээх төннөр буолбуттарынан итиитик-истиҥник эҕэрдэлиэҕиҥ.
edersaas.ru