Бүлүү улууһун Тааһаҕар нэһилиэгин «Эгэлгэ» көр-күлүү народнай тыйаатыра быйыл 10 сыллаах үбүлүөйүн бэлиэтиир.
Айымньылаахтык үлэлиир тыа сирин тыйаатырын туһунан СӨ култууратын туйгуна, «Эйгэ» норуот айымньытын дьиэтин дириэктэрэ, «Эгэлгэ» норуот тыйаатырын салайааччыта Клавдия Петрова билиһиннэрэр:
— Көрү-күлүүнү көҕүлүттэн туппут дьонноох-сэргэлээх нэһилиэкпит тыйаатырбыт 2012 сыллаахха Дмитрий Наумов «Таптал хампаанньата» кэмиэдьийэтин туруоруутунан арыйбыппыт. Бу сыллар тухары Дмитрий Наумов «Оҕустар забастовкалара», «Күргэ», «Батсаап барахсан», «Муҥур атахтар» уонна тэттик сыаҥкаларын тыйаатыр артыыстара сөбүлээн оонньууллар.
Быйыл өрөспүүбүлүкэ норуодунай тыйаатырдарыгар анаан Мэҥэ-Хаҥалас улууһун Ходулов аатынан Майатааҕы норуодунай тыйаатыр тэрийбит «Саҥа» араадьыйа испэктээҕин куонкуруһугар кыттарбытыгар «Оҕустар забастовкалара» сөбүлүүр кэмиэдьийэбитин талбыппыт. Артыыстар уон сыллааҕыта оонньообут оруолларын иккис тыыннаатылар.
Маны сэргэ, эдэр артыыстар кыттыыны ылан, испэктээхпит сонун сүүрээннэннэ. Туруорааччы режиссер Ай-Тал Осипов истээччигэ тиийимтиэ буоларын туһугар күүһүн уурда. Тыаһы-ууһу уус-уран айымньы жанрын исписэлииһэ Алексей Осипов муусуканан таҥан киэргэттэ. Араадьыйа испэктээҕэ олох атын эйгэ эбит, бэркэ сэргээтибит уонна аны да араадьыйа испэктээхтэригэр кыттан, өссө сайдан иһиэхпит буоллаҕа.
Соторутааҕыта Эгэлгэ» норуот тыйаатыра «Оҕустар забастовкалара» диэн испэктээхтэринэн «Тэтим» араадьыйаҕа «Култуура долгуна» биэриигэ тахсан, истээччи болҕомтотун тартылар. Ити курдук, тыа сирин тыйаатырдара, төһө да сыстыганнаах дьаҥ кэмэ турдар, ырааҕы да чугаһатар, тыйаатыры сэргээччи дьону куйаар нөҥүө түмэр үлэ сонун көрүҥүн бэркэ сэргээн, бииртэн биир саҥа испэктээҕи туруоран, репердуардарын хаҥатар былааннаахтар.
Елена ПОТОЦКАЯ, «Саха сирэ» хаһыат.