«Бүлүү» суола: Горнай аттынааҕы учаастакка өрөмүөн ыытылларынан сибээстээн, сырыы бытаарыа

Бу күннэргэ аһара ардаабытын уонна массыыналар элбэхтик сылдьалларын түмүгэр, «Бүлүү» федеральнай суол 143-с – 158-с км учаастага мөлтөх туруктаммыт. Ити учаастагы өрөмүөннүү сылдьаллар. Онон ардах түстэ даҕаны кэбэҕэстик алдьанар.

Билигин сырыыны харгыстаабат инниттэн ити учаастагы чөлүгэр түһэриигэ 5 анал тиэхиньикэ үлэлиир. Ити тиэхиньикэлэр бадарааҥҥа түспүт тимир көлөлөрү соһон көмөлөһөллөр. Санатар буоллахха, ити учаастакка бэс ыйыттан хапытаалынай өрөмүөн ыытыллан асфалланыахтаах.
Онон «Бүлүү суола» управление салалтата, айаннааччылар баар балаһыанньаны сөпкө өйдүөхтэрэ диэн эрэнэр, суоппардар мөлтөх туруктаах учаастактарга болҕомтолоох буоларгытыгар сүбэлиир.