Халлаан маннык сылыйан бардаҕына, кыһыҥҥы суолунан сырыы эрдэ тохтуоҕа.
Александр ТАРАСОВ, «Саха сирэ» хаһыат, https://edersaas.ru
“Бүлүү” суола управлениетын пресс-сулууспата иһитиннэрэринэн, муус устар 1 күнүттэн Таас-Үрэх сэлиэнньэтин (Миирнэй оройуона) уонна Верхнемаркова бөһүөлэк (Иркутскай уобалаһа) икки ардынааҕы учаастак кыһыҥҥы суол буоларынан сибээстээн сабыллыаҕа (1310-с – 2146-с км).
Итини тэҥэ, муус устар 1 күнүттэн Бүлүү федеральнай суолга баар өрүстэри туоруурга халлаан туругуттан тимир көлөлөр ыйааһыннарынан көрөн хааччахтааһын киириэҕэ (Үөһээ Бүлүү сэлиэнньэтин аннынан, 660-с км, Дьаархан аннынан, 752-с км, Күндээдэ 807-с км, Устье 956-с км уонна Кириэстээх 1049-с км).
Гаврил Матвеев, “Бүлүү” управлениетын пресс-сулууспатын үлэһитэ:
— Өрүстэргэ кыһыҥҥы суол билиҥҥи туругунан муус устар 15 күнүгэр сабыллыаҕа. Онон кыһыҥҥы суол сабыллыан иннинэ улахан уйуктаах тимир көлөлөөхтөр таһаҕаһы тиэйэргитигэр сүбэлиибит.