Бүлүү өрүһү туоруур муоста бырайыагын оҥорорго чинчийии үлэтэ саҕаланна
А-331 Бүлүү федеральнай айан суолун 660 км Бүлүү өрүһү туоруур муоста тутуутун бырайыактыырга чинчийии үлэтэ саҕаланна. Үлэ саҕаланыытын тэрээһинигэр «Бүлүү» айан суолун управлениетын начаалынньыга Николай Андреев, Үөһээ Бүлүү улууһун баһылыга Владимир Поскачин, олохтоох нэһилиэнньэ уонна бэдирээтчит тэрилтэ бэрэстэбиитэллэрэ кытыннылар.
Бэдирээтчит геодезическай устуу оҥорон муоста тутуллуохтаах сирин геологиятын үөрэтиэхтээх, гидрологическай кэтээн көрүү ыытыахтаах, ол кэнниттэн ол матырыйаалыгар олоҕуран, муоста бырайыагын, киирэр суолун оҥоһуутун бэлэмниэхтэрэ. Бырайыагы оҥорорго Үөһээ Бүлүү олохтоохторун санааларын учуоттуохтара.
Үөһээ Бүлүү сэлиэнньэтин аннынан Бүлүү өрүһү туоруур муоста 1,7 км уһуннаах буолуоҕа уонна онно киирэр III тиэхиньиичэскэй категориялаах суол 20 км уһуннаах диэн былаанныыллар.
Бырайыак бигэргэммитин уонна тутууну ыытар бэдирээтчит чуолкайдаммытын кэннэ муоста тутуута 2021 сылга саҕаланыахтаах. Эбийиэк федеральнай бүддьүөт үбүгэр тутуллуоҕа.
Бүлүү федеральнай айан суолугар өрүһү туоруур саамай улахан муоста тутулуннаҕына, Дьокуускай – Ньурба, Сунтаар хайысхатынан массыына сырыыта төгүрүк сыл баар буолуоҕа. Ол туһунан «Бүлүү» айан суолун управлениетын пресс-сулууспата иһитиннэрэр.
«Саха сирэ», edersaas.ru
Хаартыска «Бүлүү» айан суолун управлениетын пресс-сулууспатыттан.