Бу сайын бэс ыйыгар “АЛРОСА” экологтара Саха сирин өрүстэригэр, күөллэригэр 1,6 мөлүйүөн майаҕас балык ыаматын ыыттылар. Искэхтэри Чернышевскайдааҕы балык собуотун үлэһиттэрэ алмаастаах хампаанньаны кытта дуогабардаһан иитэллэр. «Дьааҥы, Халыма өрүстэригэр уонна Чернышевскайдааҕы ууну харайар сиргэ искэҕи мунньан, тоҕус ый тухары көрөн-истэн, биэбэйдээн таһаарабыт. Ол курдук, ааспыт ыйга Бүлүүтээҕи ууну харайар сиргэ (водохранилищеҕа) быраҥаатта, Өлүөнэ өрүскэ сибиир күндүөпкэтин искэхтэрин ыыппыппыт. Саха сиригэр Чернышевскайдааҕы балык собуота көмүс хатырыктааҕы иитиигэ бэйэтин үбүгэр уонна “АЛРОСА” көмөлөһөр харчытыгар соҕотоҕун ылсан үлэлиир», — диэн кэпсиир хампаанньа сүрүн эколога Полина Анисимова.
edersaas.ru
Чернышевскайдааҕы балык собуотуттан кырачаан ыамалары анал бакыакка уган, өрүстэргэ, күөллэргэ ыыталлар. Собуот үлэһиттэрэ маҥнай утаа «иитиллээччилэрин» быраҕан кэбиспэккэ, тымныы ууну тулуйумтуо буолалларын туһугар кыра-кыралаан ууга, саҥа эйгэҕэ үөрэтэн баран биирдэ көҥүл ыыталлар.
Аны биэс сылынан, кэтээн көрүү этэринэн, кинилэртэн 0,02% бырыһыаннара эрэ тыыннаах ордуо. 2016 сылы кытта тэҥнээн көрдөххө, 4,9 туоннаттан 2019 сылга диэри көмүс хатырыктааҕы бултааһын квотата 23 туоннаҕа диэри эбиллибит.
Инникитин “АЛРОСА” 2020-2022 сылларга Бүлүү уонна Марха өрүстэргэ чыыр балык ыаматын ыытар санаалаах. Күндү балык ыаматын иитэргэ 2019 сыл ыам ыйыгар Чернышевскайдааҕы балык собуотун кытта дуогабар түһэрсибиттэрэ. Быраҥааттаны, күндүөпкэни, чыыры таһынан, эһиилгиттэн аны хатыыс ыаматын ыытыахтара.
Санатан эттэххэ, алмаастаах хампаанньа Чернышевскайдааҕы балык собуотун кытта 2011 сылтан үлэлэһэр. Саха сирин өрүстэригэр балык ыаматын ыытарга хампаанньа сыл ахсын 3 мөлүйүөн солкуобай үбү көрөр. 2019 сылтан ити көрдөрүүнү үс төгүл улаатыннардылар.
Марианна Тыртыкова, «Саха сирэ», edersaas.ru