Бүлүү өрүскэ ойбон алларбыттарыгар кирдээх уу бычалыйан тахсыбытын туһунан видео-устуу бэҕэһээҥҥиттэн батсаап ситиминэн тарҕанна.
СӨ Экологияҕа министиэристибэтин пресс-сулууспата иһитиннэрбитинэн, Сунтаардааҕы экология иниспиэксийэтэ тустаах сиртэн уу боруобатын ылан, бэрэбиэркэҕэ ыыппыт. Экология иниспиэктэрдэрэ быһаарбыттарынан, Сунтаар, Кириэстээх сэлиэнньэлэрин уонна Мэйик учаастагын (Сунтаар сэлиэнньэтиттэн 210 км үөһээ баар) анныларынан уу таһыма үрдээбэтэх. Ону тэҥэ, ити этиллибит сирдэргэ тааҥ тахсыбатах. Онон тохсунньу 21 күнүнээҕи туругунан Сунтаар улууһун эргин Бүлүү өрүс уутун киртийиитэ тахсыбатах диэн быһаарбыттар. СӨ Экологияҕа министиэристибэтэ чугас сытар улуустарга Бүлүү өрүс уутун бэрэбиэркэлиир, ол туһунан иһитиннэрии эбии тахсыаҕа.
Хаартыска: СӨ Экологияҕа министиэристибэтин пресс-сулууспатыттан.