Бу күннэргэ Н.Г. Чернышевскай аатынан Бүлүү профессиональнай-педагогическай кэллиэһэ төрүттэммитэ 100 сылыгар аналлаах араас интэриэһинэй тэрээһиннэр ыытылла тураллар.
Биир олус кэрэхсэбиллээх тэрээһин туһунан Бүлүүттэн Екатерина Сотрудникова маннык кэпсээтэ:
— Бүлүү педучилищетын 100 сылыгар аналлаах тэрээһиннэргэ кыттыһан биһиги, 1983 сыллаах 4 «г» курс (школьно-пионерскай отделение, куратор Валентина Кириллина) выпускниктара атырдьах ыйыгар Дьокуускай-Владивосток туһайыынан айаннаан кэллибит.
Анаан-минээн Уһук Илин куораттарын көрөөрү, эдэр сааспытын санаһаары поеһынан айаннаабыппыт.
4 «г» кууруспутуттан 12 киһи буолан, Дьокуускай куораттан, Ньурба, Бүлүү, Уус Алдан, Чурапчы, Таатта улуустарыттан мустан сырыттыбыт.
Аара айаннаан иһэн, маастар-кылаас арааһын ыытан, ырыа, үҥкүү үөрэтэн, баайан, иистэнэн, училищебыт туһунан викторина таайсыһан, араас куораттарга тохтоон, астына кэпсэтэн бэрт сэргэхтик тиийбиппит. Нерюнгри, Тында, Хабаровскай, Белогорскай курдук араас куораттарга тохтоон, тахсан көрбүппүт.
Владивосток куорат кэрэ сирдэригэр, мусуойдарыгар, сөтүөлүүр сирдэригэр астына сынньанныбыт.
Үөрэппит учууталларбытын ахтан, кинилэргэ махталбыт бэлиэтин — училищебытыгар былырыын бэлэхтээбит «Бүлүүгэ эдэр сааспыт саамай кэрэ кэмнэрэ» кинигэбитин арыйан көрө-көрө, астына-дуоһуйа сырыттыбыт, умнуллубат кэмнэрбитин ахтыһан ыллыбыт.
Маннык сырыы наһаа көхтөөх эбит. Бары олус бэркэ уоппускабытын бииргэ атааран, кэлэр сыл кулун тутарыгар аны училищебыт 100 сыллаах үбүлүөйүгэр көрсүһүөх буоллубут.
… Ити курдук, үбүлүөйдээх тэрээһиннэри бэрт сэргэхтик бэлиэтиэххэ сөп бэртээхэй холобурун Бүлүүтээҕи педучилище 1983 сыллааҕы выпускниктара көрдөрдүлэр.
Елена ПОТОЦКАЯ, «Саха сирэ» хаһыат.