Доруобуйа Маны аах

Бөлөҕүнэн дьарыктанар эбии үөрэхтээһин тэрилтэлэрин иитиллээччилэрэ тэйиччиттэн көрүҥҥэ көһөллөр

Коронавирус тарҕаныытын сэрэтэр уонна тохтотор инниттэн Дьокуускай куорат үөрэҕин управлениетын бирикээһэ таҕыста.

edersaas.ru

Дьокуускай куорат үөрэҕин управлениетын начаалынньыга Алексей Семенов иһитиннэрбитинэн, 2022 сыл тохсунньу 13 күнүнээҕи туругунан, куорат оскуолаларын 34 кылааһа тэйиччиттэн үөрэниигэ олорор. Итинтэн 27 кылаас коронавируһунан сибээстээн, атыттара – тумуунан.  “Билиҥҥитэ куорат оскуолаларыгар балаһыанньа кэминэн. Оскуолалар бары олоҕурбут көрүҥүнэн үлэлииллэр. Ол эрээри, коронавирус омикрон штаммынан син биир сэрэтэр үлэ барара ирдэнэр”, — диэн начаалынньык эттэ.

Ыарыыны тарҕаппат инниттэн үөрэх управлениетын саҥа бирикээһэ таҕыста.

Бастакытынан, 2022 сыл тохсунньу 17 күнүттэн эбии уопсай сайыннарар бырагырааманан бөлөҕүнэн дьарыктары (групповые занятия) ураты дьаһал тахсыар диэри тохтоторго диэн этилиннэ. Тустаах дьарыктары үөрэх дистанционнай технологияларын туһунан ыытары хааччыйары ыйаллар.

Иккиһинэн, эбии үөрэхтээһин дьарыктарын оскуолаларга үөрэнээччилэри тус-туспа (с учетом разобщения обучающихся) уонна санитарнай-эпидемиологическай ирдэбиллэри тутуһан ыытарга диэн суруллар.

Ол эбэтэр, судургутук быһаардахха, хас даҕаны оскуолалартан бииргэ мунньан эбии дьарыктыыр тэрилтэлэр (Оҕо айымньытын дыбарыаһа, тиэхиньиическэй сайыннарыы киинэ, оҕо подростковай киинэ)  дистанционнай технологиялары туһанан үөрэтэллэр. Оттон оскуола иһинээҕи, бэйэлэрин оҕолорун эрэ сайыннарар эбии дьарыктар оннунан хааллылар.

Үсүһүнэн, өрөспүүбүлүкэ уонна куорат уокуругун таһымнаах бары спортивнай уонна култуурунай-маассабай тэрээһиннэрин тохтоторго диэн ыйыллар.

 

Людмила ПОПОВА, “Саха сирэ” хаһыат, edersaas.ru

3
0
Telegram @edersaas20