Бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев Бүлүү улууһугар сылдьар кэмигэр Хаҕын, Кыргыдай, Бороҕон, Тоҕус уонна I Тоҕус нэһилиэктэрин олохтоохторун кытта көрсөн кэпсэттэ.
Мастаах күөл тулатыгар олорор Хаҕын, Кыргыдай уонна Тоҕус дьонун улуу эбэлэрин уута оттонор ходуһаларын былдьаан сытара долгутар. Министиэристибэ мелиорацияҕа управлениетын салайааччыта Алексей Гуляев бэйэтэ тиийбитинэн тоҕооһуннаран, мастаахтар ууну түһэрии үлэтин тэтимирдэргэ туруорустулар. Сопхуос өрөгөйдөөн олорор сылларыгар мелиоратордар Мастаах уутун түһэрэн, 2 тыһ. гектар иэннээх сири таһаарбыттара. Ол кэлиҥҥи угут сыллар содулларыгар, кыралаан түһэрбиттэрин даҕаны иһин, ходуһата икки төгүл кыараан турар. Онон тыа сирин ыаллара сүөһүлэрин-астарын дэлэтэллэрэ харгыстаммытын этинэллэрэ оруннаах.
Иккиһинэн, сааскы өртөөһүнү көҥүллүүргэ көрдөһөллөр. Россия регионнарыгар иллэрээ саас-сайын дьон өлүүлээх, элбэх дьиэ былдьаныылаах ойуур уотунан сылтаҕыран дойду салалтата өртөөһүнү бобон кэбиспитэ. “Сир-дойду өртөммөт буолан, “буорахтаах буочукаҕа” кубулуйар кутталланна итиэннэ сэтиэнэҕи сүөһүгэ сиэтэн элбэх үүтү-эти ылбаккын”, — дэһэллэр тыа дьоно. Тус бэйэм Сылгыһыт күнүгэр сылгыһыттартан кэлиҥҥи сылларга сылгы кутуйах ииктээбит сэтиэнэҕин-лаҥхатын сиириттэн кулуннааһын түбэлтэтэ элбээн иһэрин истибитим.
Манна сыһыаран эттэххэ, РФ тыатын хаһаайыстыбатын миниистирин бастакы солбуйааччы Джамбулат Хатуов быйыл Дьокуускайга кэлэ сырыттаҕына, министиэристибэҕэ өртөөһүн боппуруоһун туруорбуттарыгар: “Сурукта суруйан киллэриҥ. Саха сирин уратытын аахсан, көҥүллүүр гына быһаара сатыахпыт”, — диэн эрэннэрэн турар. Онон, билэр дьон бигэргэтэринэн, “тылын тыалга бырахпат” салайааччы дьаһал таһаарар суолу тобуларын сэмээр күүтэбит.
Петр Алексеев Хаҕыҥҥа граннаах эдэр фермердэр Кирилл Алексеев, Анисия Докторова хаһаайыстыбаларын уонна 22 саастаах Дьулустаан Киряев саҥа тутта сылдьар хотонун көрдө-иһиттэ. Бааһынайдары таһынан бу эргиннээҕи нэһилиэктэргэ барыларыгар производственнай кэпэрэтииптэр үлэлии олороллор. Бүлүү улууһун салалтата даҕаны билинэринэн, ити кытыы нэһилиэктэр саамай элбэх сүөһүлээхтэр. Инньэ гынан бырабыыталыстыба баһылыгын бастакы солбуйааччы сололоох миниистир аныгылыы толору механизациялаах улахан хотоннору туттарыах буолбутуттан Мастаах түбэтин олохтоохторо өссө күүскэ үлэлииргэ, сайдарга эрэллээх хааллылар.
Василий НИКИФОРОВ, «Саха сирэ» хаһыат, edersaas.ru