Саха бастакы идэтийбит композитора Марк Николаевич Жирков төрөөбүтэ 130 сылын чэрчитинэн «Сыгый Кырынаастыыр» опера көрөөччү дьүүлүгэр аан бастакытын таҕыста. Бүлүү улууһун салалтата маннык бөдөҥ бырайыагы олоххо киллэрэн, чахчы да Саха АССР 100 сылыгар улахан суолталаах бэлэҕи оҥордо, историяҕа умнуллубат суолу хаалларда, итиэннэ биир дойдулаахпыт саха бастакы идэтийбит композитора Марк Жирков аатын үйэтитиигэ сүдү кылааты киллэрдэ.
Ол курдук, муус устар 13 күнүгэр 18.30 чаастан Дьокуускайга Д.К. Сивцев-Суорун Омоллоон аатынан Опера уонна балет судаарыстыбаннай тыйаатырыгар Саха АССР тэриллибитэ 100, саха бастакы композитора Марк Николаевич Жирков төрөөбүтэ 130 сылларыгар аналлаах М. Жирков, Г. Литинскэй «Сыгый Кырынаастыыр» опералара туруоҕа.
Саха музыкальнай эйгэтигэр операны аан бастаан С.А.Зверев-Кыыл Уолун аатынан Үҥкүү Национальнай тыйаатырын уонна М. Н. Жирков аатынан Бүлүүтээҕи оҕо ускуустубатын оскуолатын саха национальнай үнүстүрүмүөннэрин холбоһуктаах оркестра доҕуһуоллуоҕа. Опера хуорун уонна сүрүн партияларын Бүлүү куоратыгар, Бастакы Тоҕус, Чочу, 2 Күүлэт, Бөкчөҥөө нэһилиэктэригэр олорор араас үлэлээх, дьарыктаах эриэккэс куоластаах уус-уран самодеятельность кыттыылаахтара толороллор. Үҥкүүлэри Үҥкүү тыйаатырын эр дьонун труппата, Н.Г. Чернышевскай аатынан Бүлүүтээҕи профессиональнай-педагогическай колледж «Айылгы» Ырыа-үҥкүү норуодунай ансамблын кыргыттарын бөлөҕүн толорууларыгар көрүөххүт.
Туруорааччы-режиссер — Саха Өрөспүүбүлүкэтин үтүөлээх артыыһа Прокопий НЕУСТРОЕВ.
Билиэттэр «Центральнай» киинэ тыйаатырын, Саха цииркэтин, Кулаковскай аатынан Норуоттар доҕордоһууларын дьиэтин каассаларыгар атыыланар. Билсэр нүөмэргит: 89241676340.