Айылҕа харыстабыла

Бүлүүлэр ойуур баһаарын умуруорууга көхтөөхтөр

Бүлүү улууһун дьоно ким туох кыахтааҕынан ойуур баһаарын умуруорууга көхтөөхтүк көмөлөһө сылдьаллар.

Ол курдук, бүгүн улуус дьаһалтатыгар Балаҕаччыларга анаан, «Куобахчаан», Радуга», «Кустук», «Сардаҥа», «Биһикчээн» оҕо уһуйааннарын, улуустааҕы социальнай көмө үлэһиттэрэ бурдук аһын, бородуукта аҕалан ыыттылар.

Кыргыдай оскуолатын 1983 с. бүтэрбит выпусниктар бородуукта, урбаанньыттар: Васильев Николай Нестерович иһэр уунан, Егоров Иван Николаевич 5000 солк, Хампатааҕы «Кэскил» уһуйаан кэлэктиибэ 9500 солк харчынан көмөлөстүлэр.

Урбаанньыт Яков Ильинов эрэһиинэ саппыкылары, урбаанньыт Хун Венцын 15 камуфуляжнай форманы, былаат, бэрчээкки, кумаартан, бырдахтан көмүскэнэр тэриллэри биэрдилэр.

Урбаанньыт Ольга Алексеева (Сава) Кыргыдай, Балаҕаччы, Бастакы Күүлэт, Үгүлээт баһаардарыгар анаан хас биирдии нэһилиэккэ 200-түү литирэ «А-93» маркалаах бензиҥҥэ карточка арыйда, АЗС-ка харчы хомуйар дьааһыгы уурда.

Ил Түмэн дьокутаата Нюргуяна Захарова Мастаах эҥэргэ балаһыанньаны миэстэтигэр билсэ таҕыста уонна Мастаах суолларыгар ыытыллыахтаах үлэни билистэ.

Улуус баһылыгын бастакы солбуйааччы Иван Евсеев Балаҕаччыга, Кыргыдайга тахсан баһаарга туох салгыы дьаһаллары ылары миэстэтигэр тахсан үлэлэлэһэн киирдэ. Баһаар содулуттан “Балаҕаччы” ПК 150 субан сүөһүтэ сүтэн аймалҕан таҕыста, 80 субаны сарсыныгар көрдөөн буллулар. 70 субан баһаар буола турар сиригэр, Кыргыдайга, тиийбиттэрин хомуйан аҕаллылар.

Бүлүүттэн Андрей-Чуос.

0
0