Бүлүү улууһуттан төрүттээх куорат олохтоохторо олунньу 21 күнүгэр Евгений Григорьевы кытта көрүстүлэр. Аныгыскы ый бүтүүтэ Дьокуускай куорат баһылыгын быыбарыгар туруорунаары сылдьар Евгений Николаевиһы өйүүллэрин биллэрээри бас-көс дьон муһуннулар.
Маҥнайгынан тылы ытыктабыллаах кырдьаҕастара, Бүлүү улууһун бочуоттаах олохтооҕо, өрөспүүбүлүкэ физическай култууратын уонна спордун туйгуна Алексеев Афанасий Егорович ылла:
– Куоракка 1962 сыллаахтан олоробун, онон элбэх салайааччыны кытта үлэлэһэн кэллим, хайдах үлэлииллэрин куруутун кэтээн көрөбүн, билэбин. Бэйэм даҕаны үс сыл устата куорат боппуруостарыгар түбүгүрэ сылдьыбытым. Онон бу олус сылаалаах, улахан үлэ буоларын бэркэ билэбин. Евгений Николаевич икки сыллаах үлэтинэн сатабыллаах салайааччы буоларын көрдөрдө. Мэринэн талылыннаҕына, эдэр ыччат спорка сыстарыгар улахан үлэни ыытарыгар сүбэлиэм этэ. Онон Евгений Григорьевы өйүүр санаалаахпын!
Евгений Григорьев мустубут дьону кытта Дьокуускай сайдыытын хайдах көрөрүн туһунан санаатын үллэһиннэ. Куорат ыган кэлбит кыһалҕаларын быһаарар ньымаларын кэпсээтэ. Хаарбах дьиэлэртэн дьону көһөрүү, суол тутуутун кээмэйин улаатыннарыы, оскуола, дьааһыла миэстэтин элбэтии курдук уустук ыйытыылары хайдах, ханнык болдьоххо быһаарыахха сөбүн сэһэргээтэ.
Бүлүү улууһун баһылыга Сергей Николаевич Винокуров:
– Бу кэлэр быыбарга тус бэйэм сатабыллаах салайааччы быһыытынан бэйэтин көрдөрбүт Евгений Николаевиһы өйүүр санаалаахпын. Тутуу курдук уустук салааны икки сыл устата салайда. Тутуу ханнык баҕарар куорат – кэскилэ, сайдыытын сибикитэ. Онон тутууга уопуттаах эдэр киһи Дьокуускайы сөп хайысханан сайыннарыа дии саныыбын.
Саха норуодунай артыыһа, ырыаһыт Алексей Егоров соторутааҥҥыга диэри Евгений Григорьев ким буоларын билбэт этим диэтэ. “Хата уолаттарым Өркөн уонна Харысхан бэркэ диэн билэллэр эбит. Туох дьарыктааҕын, тугу оҥорбутун кинилэртэн сураһан баран, чахчы сатыырдаах, үлэһит киһи эбит диэн түмүккэ кэллим. Онон биһиги дьиэ кэргэн Евгений Григорьев диэкибит”, — диэн эттэ.
Көрсүһүүгэ анаммыт балтараа чаас бэрт түргэнник ааста. Мустубут биэс уонча киһи Евгений Григорьевка ситиһиини баҕардылар, кинини өйүүр биир санааны ылынан тарҕастылар.
Сандал Иванов