Бүлүүлэр биир дойдулаах бэтэрээннэрин эҕэрдэлээтилэр (ХААРТЫСКА)
Улуу Кыайыы күнүн көрсө Бүлүү улууһун землячествотын түмсүүтэ Дьокуускайга олорор бэтэрээннэрин үгэс курдук бүгүн, ыам ыйын 3 күнүгэр, түмэн эҕэрдэлээтилэр. Уоттаах-күөстээх кэнсиэр, ирэ-хоро кэпсэтии, санаа атастаһыыта Үүнэр көлүөнэ тыйаатырын уораҕайыгар буолла.
Манна сэрии бэтэрээннэрэ Кирилл Егорович Павлов, Егор Павлович Уваров, Афанасий Иннокентьевич Николаев уонна тыыл бэтэрээннэрэ кытыннылар.
Улуус баһылыга Сергей Винокуров, «Бүлүү Кэскилэ» түмсүү Кыайыыны уһансыбыттарга бэлэхтэри туттардылар. Көрсүһүүгэ Бүлүү үс урукку баһылыга Юрий Михайлов, Анастасия Павлова, Дмитрий Махаров кытыннылар.
«Ситим» улуус ыччатын түмсүүтэ кэнсиэркэ сатаан кэлбэтэх бэтэрээннэри дьиэлэригэр тиийэн үөртүлэр-көтүттүлэр.
Бүлүү улууһун землячествотын түмсүүтэ тэрээһиҥҥэ кыттыбыт биир дойдулаахтарыгар итиэннэ Үүнэр көлүөнэ тыйаатырын дириэктэрэ Алексей Павловка дириҥник махтаналлар.
«Саха сирэ» хаһыат, edersaas.ru сайт.