Бүлүү улууһун нэһилиэктэриттэн Лөкөчөөн нэһилиэгэ Тупсарыы сылын үчүгэй көрдөрүүлээх түмүктээбитэ. Былырыын алтынньыга командировкаҕа сылдьан, аҕыйах сыл иһигэр элбэх саҥа дьиэ тутуллан үлэҕэ киирбитин сэргии көрбүтүм. Ити сылдьар кэммэр саҥа хочуолунайы хаһаайыстыбаннай ньыманан тута сылдьаллара.
Бу ааспыт өрөбүллэргэ 3,75 МВт кыамталаах хочуолунайы аһыы үөрүүлээх быһыыга-майгыга буолан ааста. Тэрээһиҥҥэ «ОДьКХ» ГУП генеральнай дириэктэрэ Виктор Омуков, Бүлүү улууһун баһылыга Сергей Винокуров кытыннылар.
Нэһилиэк баһылыга Анна Доргонова: «2013 сылтан саҥа хочуолунайы тутары инвестиционнай бырагыраамаҕа хаста да киллэрэ-киллэрэ таһаарбыттара. Былырыын күүстээх туруорсуу буолбутугар, 4 мөл.солк. буллаххытына, тутар кыахтаахпыт диэбиттэрэ. Улуус бүддьүөтэ 2 мөл. солк. көмөлөһөн, нэһилиэк 2 мөл. солк. көрөн, былырыын атырдьах ыйыттан хаһаайыстыбаннай ньыманан Лөкөчөөннөөҕү коммунальнай хаһаайыстыба начаалынньыга Семен Николаев быһаччы салалтатынан саҥа хочуолунайу тутуу саҕаламмыта. Дьиэлэри киин ититэр ситимҥэ холбуурга былырыын нэһилиэк бүддьүөтүттэн 1,5 мөл. солк. көрөн, 500 м уһуннаах ититэр ситим матырыйаалын атыыласпыппыт.
Саҥа хочуолунай кыамтата баар дьиэлэри барыларын итиинэн хааччыйыахтаах. Билигин нэһилиэк үрдүнэн 26 ыал ититэр ситимҥэ холбонон олорор.
Быйыл 500-чэкэ м уһуннаах киин ититэр ситим оҥоһулуннаҕына, элбэх ыал хочуолунай итиитинэн хааччыллыаҕа. Ыраах сытар түөлбэлэргэ ситими тардыы уустук буолар туруктаах эрээри, кэлэр сылларга бүддьүөттэн эбии үп көрөн, төһө кыалларынан, быһаарыахпыт», – диэн кэпсээтэ.
«ОДьКХ» ГУП генеральнай дириэктэрэ Виктор Омуков Бүлүү улууһунааҕы филиал кэлэктиибин кытта көрсөн, туох былааннаахтарын, кыһалҕалаахтарын ыйыталаһан, ирэ-хоро кэпсэттэ.
Билигин саҥа хочуолунай кулуубу, дьаһалта дьиэтин, спортивнай сааланы, оҕо саадын, фельшерскэй-акушерскай пууну уонна 26 чааһынай дьиэни итиинэн хааччыйар. Александр ТАРАСОВ, edersaas.ru