Бүгүн, ахсынньы 17 күнүгэр, Өймөкөөн улууһун салалтата дьиэ кэргэттэри кытта куйаар ситиминэн быйылгы сылы түмүктүүр кэмпириэнсийэни тэрийэн ыытта.
edersaas.ru
Тэрээһиҥҥэ МТ баһылыга Иннокентий Сивцев уонна улуустааҕы ЗАГС отделын салайааччыта Авдотья Кондакова кыттыыны ыллылар.
Улуус баһылыга быйыл, коронавирус сыстыганнаах дьаҥынан төһө да уустук кэм буоллар, оройуон үгүс дьиэ кэргэнигэр бэрт ситиһиилээх сыл ааһан эрэрин бэлиэтээтэ. Ол курдук, баһылык өрөспүүбүлүкэ 100 ыала дьиэ кэргэн, үйэлээх таптал күнүгэр «Эрэллээх уонна үйэлээх таптал» бэлиэнэн наҕараадаламмыттарын иһитиннэрэн туран, кинилэр ортолоругар Сордоҥноох нэһилиэгин олохтоохторо, 34 сыл бииргэ олорбут, биэс уолу үлэнэн ииппит Александр уонна Оксана Гермогеновтар баалларын бэлиэтээтэ. Маны таһынан, бу күннэргэ Үчүгэй нэһилиэгиттэн Семен уонна Ирина Винокуровтар өрөспүүбүлүкэтээҕи дьиэ кэргэн куонкуруһугар «Көһө сылдьар олохтоох дьиэ кэргэн» номинацияҕа 2-с миэстэҕэ тиксибиттэрин эттэ.
Куйаар ситиминэн ыытыллыбыт улуус дьиэ кэргэттэрин кэмпириэнсийэтин ыытааччы Раиса Садыкова 2007 сыллаахха от ыйын 8 күнүгэр – Үйэлээх таптал уонна бэйэ бэйэҕэ эрэл күнүгэр билсэн ыал буолбут, билигин үһүс оҕолорун күүтэр Полина Домнина уонна Василий Готовцевы билиһиннэрдэ. Полина Олеговна быйыл кэргэнинээн өрөспүүблүкэтээҕи дьиэ кэргэн куонкуруһугар «Эдэр ыал» номинацияҕа кыттыбыттарын, онно 7 видеоролигы устубуттарын кэпсээтэ уонна кинилэргэ көмөлөспүт дьоҥҥо истиҥник махтанна.
Улуус баһылыга Иннокентий Сивцев быйыл улуус 100 сылынан, дьиэ кэргэн хаһаайыстыбаларын күрэстэригэр кыайыылаахтар ааттарын ааттаан туран, харчынан бириэмийэмилэммиттэрин иһитиннэрдэ.
Улуустааҕы ЗАГС отделын салайааччыта Авдотья Кондакова быйыл улууска cаҥа 28 ыал эбиллибитин, 77 оҕо (2019 c. — 57 оҕо) күн сирин көрбүтүн иһитиннэрдэ. Баһылык улуус 100 cылынан сибээстээн, хас биирдии кырачааҥҥа олоҕун бастакы хардыытын бэлиэтиир өйдөбүнньүк бэлэҕи анаата.
Ийэ дойдуга бэриниилээх буолуу уонна Өймөкөөн улууһун 100 сылын бэлиэтиир тэрээһини МТ баһылыга Иннокентий Сивцев бэрт иһирэх тылынан түмүктээтэ:
— Хас биирдии дьиэ кэргэҥҥэ оҕо төрөөһүнэ дьолу, эйэни, кэскили түстүүр. Оттон улуус социальнай-экэнэмиичэскэй сайдыытыгар оҕо төрөөһүнэ «Демография» диэн салаанан киирэн, оройуон сайдыытын биир сүрүн көрдөрүүтүнэн буолар.
Оҕо төрөөһүнэ элбэх сиригэр кэскиллээх тосхол торумнанар, олох бигэ туруктааҕа көстөр. Быйыл үбүлүөйдээх сылга Өймөкөөҥҥө оҕо төрөөһүнүн эбиллиитэ – ытык бэлиэ туоһута: ол аата улууспут сарсыҥҥылаах уонна инникилээх!, — диэтэ.
Елена ПОТОЦКАЯ, «Саха сирэ» хаһыат, edersaas.ru