Үбүлүөйдээх сыл алта ыйыгар 5 375 оҕо күн сирин көрдө

Ааптар: 
Бөлөххө киир:

Саха сиригэр сыл бастакы аҥаарыгар 5,3 тыһ. оҕо күн сирин көрдө.

Өрөспүүбүлүкэ үбүлүөйдээх 2022 сылын алта ыйыгар 5 375 оҕо төрөөтө – 2810 уол уонна 2565 кыыс. Бу кырачааннар бука бары СӨ Ил Дархана Айсен Николаев Саха АССР 100 сылыгар төрөөбүт оҕолорго олохтообут «Үйэ оҕолоро» хапытаала сэртипикээтин туталлар. 2022 сыл бэс ыйыгар 978 оҕо күн сирин көрбүт: 526 уол уонна 452 кыыс.

«Үйэ оҕолоро» хапытаалы олорор усулуобуйаны тупсарыыга, көлө ылыытыгар ордук туһаналлара бэлиэтэнэр. Олорор усулуобуйаны тупсарыыга – 256, көлөнү ыларга 108, үс дьиэ кэргэн көмө хаһаайыстыба тэринэргэ, икки дьиэ кэргэн оҕолоругар ууруу гынан хаалларарга быһаарыммыттар.

«Үйэ оҕолоро» бырагыраама тус сыаллаах хапытаала 2022 сыл тохсунньу 1 күнүттэн бу сыл ахсынньы 31 күнүгэр диэри төрөөбүт (иитэ ылбыт)  оҕолорго ананар. Төрөппүттэр РФ гражданиннара буолуохтаахтар уонна Саха сиригэр олороллорун туһунан регистрация ирдэнэр. Маны сэргэ, оҕо төрөөбүтүн туһунан туоһу суругу ЗАГС уорганнарыттан ылыахтаахтар.

Хапытаалы олорор усулуобуйаны тупсарарга, тырааныспар ыларга, РФ дьиэ кэргэнинэн сынньанарга туһаныахтарын сөп. Маны таһынан, оҕону үөрэхтээһиҥҥэ, оҕоҕо үрдүк технологиялаах мэдиссиинэ көмөтүн туһанарга, медицинскэй уонна социальнай реабилитацияҕа, санаторнай-курортнай эмтэниигэ, ол иһигэр өрөспүүбүлүкэ таһыгар эмтэнэргэ оҕо уонна арыаллааччы айанын төлөбүрүн киллэрэн туран, эми-тому ыларга, кэтэх хаһаайыстыбаны сайыннарарга, ол иһигэр тыа хаһаайыстыбатын тиэхиньикэтин атыылаһарга, оҕо олоҕун уонна доруобуйатын страховкалааһыҥҥа, уо.д.а туһаныахха эмиэ сөп.

+1
0
+1
0
+1
0
+1
0
+1
0
+1
0
+1
0