Үбүлүөйдээх кыһыҥҥы туризм бэстибээлин ситиһиитэ

Бөлөххө киир:

Урукку сылларга кыһыҥҥы туризм бэстибээлигэр сүрүннээн олохтоохторго болҕомто ууруллар буоллаҕына, быйылгы тэрээһин ис хоһооно улууска туризм салаатын сайыннарыыга туһуланна.

Бу туһунан улуус муниципалитета баһылыга Иннокентий  Сивцев санаатын бу курдук үллэһиннэ:

— Быйылгы үбүлүөйдээх бэстибээл сүрүн соруга — туристары көрсүү сиэрин-туомун, култууратын торумнааһын, үлэ көрүҥүн үөрэтии, инфраструктураны сайыннарыы. 20 сыл устата ыытыллыбыт үлэ сыалын ситтэ —  тымныытынан аатырар Өймөкөөн улууһун аан дойду барыта билэр, оттон Чысхаан уонна Тымныы Саха сирин брендинэн буоллулар.

Туризмы сайыннарыыга олохтоохтук ылсар инниттэн өрөспүүбүлүкэ салалтатын кытта ыкса сибээһи тутуһан, инфраструктураны сайыннарыыга, каадырдары үөрэтиигэ, туризм сервиһин таһымын үрдэтиигэ көдьүүстээх үлэни ыытыахпыт. Ол инниттэн быйыл улуус киинигэр Уус-Ньараҕа оройуон социальнай-экэнэмиичэскэй сайдыытыгар туһуламмыт сүбэ мунньах буолуоҕа. Бу туһунан бэстибээл кэмигэр СӨ Бырабыыталыстыбатын Бэрэссэдэтэлэ Андрей Тарасенконы кытта сүбэлэстибит. Үрдүкү былаас уорганын салайааччыта «Өймөкөөн» сөмөлүөт түһэр былаһааккатын көрдө-үөрэттэ, улуус аатырбыт учуонай-сылгыһыта Николай Винокуров салайар «Тонор» өрөспүүбүлүкэ эдэр сылгыһыттарын үөрэтэр-такайар үөрэхтээһин анал баазатын үлэтин кытта билистэ, сылгыһыттары кытта көрүстэ.

Маны таһынан, быйылгы кыһыҥҥы туризм бэстибээлигэр өрөспүүбүлүкэ үс үрдүк үөрэҕин кыһатын ректордара көрсөн, туризм сайдыытыгар туһаайыллыбыт үлэ сүрүн боппуруостарын дьүүллэстилэр. Үрдүк үөрэх кыһаларын преподавателлэрэ уонна устудьуоннара улуус нэһилиэктэрин олохтоохторугар аһы астааһыҥҥа, сувенирдары оҥорууга, эти-хааны эрчийиигэ маастар-кылаастары ыыттылар. Бу тэрээһиҥҥэ аан дойдуга биллэр саха учуонайдара — социологическай наука дуоктара Ульяна Винокурова уонна мэдиссиинискэй наука дуоктара Револий Захаров кыттан, кыһыҥҥы туризм бэстибээлин таһымын үрдэттилэр. Соторутааҕыта Дьокуускайга ыытыллыбыт норуоттар икки ардыларынааҕы «Тымныы уонна Доруобуйа» научнай-практическай сэминээр Тымныы полюһугар кыһыҥҥы туризм үбүлүөйдээх бэстибээлигэр түмүктэннэ.

Онон 20 сыл үбүлүөйдээх кыһыҥҥы туризм бэстибээлигэр СӨ Бырабыыталыстыбатын Бэрэссэдээтэлэ Андрей Тарасенко кыттыыны ылбытын түмүгэр быйыл улуус сайдыытыгар анаммыт суолталаах мунньах ыытыллыаҕа.

Елена ПОТОЦКАЯ, «Саха сирэ» хаһыат, edersaas.ru

Ааптар хаартыскалара.

+1
0
+1
0
+1
0
+1
0
+1
0
+1
0
+1
0