Бүлүү улууһун I Күүлэт нэһилиэгэр күүтүүлээх уонна улахан үөрүүлээх дьоро түгэн буолла – улууска суох үчүгэй тутуулаах, көстүүлээх саҥа Култуура киинэ арылынна.
Култуура киинэ 750 кв м иэннээх, 150 көрөөччү киирэр саалалаах, үҥкүүлүүр сирдээх, киэҥ фойелаах, элбэх хостоох, библиотекалаах, муостата керамическай билииткэлэринэн, таһа-иһэ үчүгэй көстүүлээх аныгы матырыйаалларынан бүрүллүбүт, сырдык, улахан түннүктэрдээх, ис-тас өттө ураты ойуор-мандар оҥоһуулаах, гааһынан ититиллэр. Өссө киэһэ, түүҥҥү кэмҥэ, тас өттө сырдатыллара ураты көстүүнү биэрэр, тупсарар курдук…
Этиҥ түспүтүн кэннэ
2012 сыллаахха иккис саҥатык соҕус тутуулаах кулуупка этиҥ түһэн, күл-көмөр буолбут бастакы уолусханын ааһыыта, түмсүүлээх, үлэһит дьонноох күүлэттэр саҥа кулуубу тутарга туруммуттара.
Сыл түмүктэниитэ нэһилиэк баһылыга Айаал Новиков бырайыак оҥорторон, эһиилги сылыгар Ленскэйтэн мас атыылаһан, ыраах сиртэн буруус маһы тиэйтэрэн, бөһүөлэк киинигэр, бастакы кулууп турбут сиригэр саҥа кулууп тутуута саҕаламмыта. Кулуубу тутууга – холлоҕоһун таһаарыыга, түөрт “башнялаах” үрдүн бүрүйүүгэ, бетон үлэтигэр, иһин-таһын оҥорууга, киэргэтиигэ олохтоох дьон, барытыгар сыстаҕас үс көлүөнэ уустар, сыстан хаачыстыбалаахтык туттан үлэлээбиттэрин ураты көстүү быһыытынан бэлиэтиэххэ сөп.
Кулуубу үөрүүлээх арыйыыга ытык кырдаҕас Егор Васильев эҕэрдэ тылы эттэ, баһылык Айаал Новиков кулуубу туппут биригээдэ салайааччытыгар Егор Федоровка символическай күлүүһү туттарбытын, кини кулууп дириэктэригэр Геннадий Петровка үөрүүлээх быһыыга-майгыга биэрдэ, эҕэрдэ тылы этэригэр хайдах үлэлээбиттэрин аҕынна.
Киирии лиэнтэни баһылык Айаал Новиков, улуус баһылыга Сергей Винокуров, култуура, ыччат, дьиэ кэргэн бэлиитикэтигэр управление салайааччыта Сергей Шамаев, кулууп дириэктэрэ Геннадий Петров “уруй-айхал” тылларынан доҕуһуоллатан быстылар.
Кулуупка уһуннук үлэлээбит Фатима уонна Антон Яковлевтар сырдык кэриэстэригэр оҕолоро, сиэннэрэ өйдөбүнньүк дуосканы эмиэ ытыс доҕуһуолун ортотугар арыйдылар.
Нэһилиэк баһылыга Айаал Новиков, улуус дьаһалтатын баһылыга Сергей Винокуров, ИСУ салайааччыта Владимир Степанов, култуура, ыччат, дьиэ кэргэн бэлиитикэтигэр управление салайааччыта Сергей Шамаев, Суорун Омоллоон аатынан Опера уонна балет тыйаатырын кылаабынай дирижера Алексей Унаров, улуус бэтэрээннэрин Сэбиэтин салайааччы Герасим Солтуев, оройуон Сэбиэтин дьокутаата, “Күүлэт” түмсүү салайааччыта Алексей Степанов, ХИФУ мединститутун доцена, наука хандьыдаата Антон Яковлев, Саха АССР үтүөлээх бырааһа, куорат бэтэрээннэрин Сэбиэтин бэрэссэдээтэлэ Никита Матвеев тыл эттилэр, наҕараадалары туттардылар.
Нэһилиэк баһылыга Айаал Новиков I Күүлэккэ култуура сайдыытын түһүмэхтэрин, кулууп тутуутун, култуура эйгэтигэр үлэлээбит дьону үтүө тылынан ахтан туран, бу дьоро күн үлэ дьонугар элбэх Махтал суруктары туттарда.
Улуус баһылыга Сергей Винокуров саҥа кулууп киирбитинэн эҕэрдэлииригэр, тутуу өссө салҕаныаҕын, оскуола тутуута хамсаабытын иһитиннэрдэ, олохтоох дьон хайдахтаах да улахан тутууну ыытар кыахтаахтарын көрдөрбүттэрин, улууска күүлэттэр холобур буолбуттарын бэлиэтээтэ.
Мөлүйүөн аҥаарын бэлэхтээтилэр
Култуура киинин материальнай-техническэй базатын бөҕөргөтөргө Култуура министиэристибэтин аатыттан мөлүйүөн аҥаара солк. сертификаты уонна национальнай инструменнар кэмпилиэктэрин баһылык Айаал Новиковка, кулууп үлэһиттэригэр министиэристибэ Бочуоттаах кыраамататын Мария Ивановаҕа, Махтал суруктары Геннадий Петровка, Розалия Васильеваҕа туттарда, “Култуура, духуобунас эйгэтигэр үтүөлэрин иһин” улуус бэлиэтин Анатолий Тутукаровка, култуура киинин тутууга тус кылааттарын киллэрбиттэрин иһин министиэристибэ Махтал суруктарын тутуу биригээдэтин салайааччыларыгар Андрей Титовка, Егор Федоровка, «Култуураҕа үтүөлэрин иһин» улуус баһылыгын кырааматаларын, Махтал суруктарын элбэх киһиэхэ туттарда.
Ыраах сытар Күүлэт сиригэр бу дьоро киэһэ саҥа Култуура киинэ үлэҕэ киирэн, дьон үөрүүтэ үксээтэ, элбэх үтүө тыл этилиннэ, үлэһит дьон бэлиэтэннэ, киэһэ хойукка диэри ырыаһыт, үҥкүүһүт талааннаахтар улахан кэнсиэр туруорбуттарын дьон-сэргэ астына-үөрэ көрдө, уруйдаата.
edersaas.ru