Тохсунньу 25 күнүгэр Бүлүү улууһун дьаһалтатын иннигэр Халбаакы олохтоохторо пикет оҥоруохтаах этилэр. Онтуларын бүгүн тохтоппуттарын иһитиннэрдилэр. Бүгүҥҥү туругунан уопсастыбанньыктар дьокутааттар уонна дьаһалта биир тылы буларын кэтэһэллэр.
Иван Васильев.
Алмаас дивидениттэн киирэр үптэн Бүлүү улууһун Халбаакытыгар ититэр ситими тардыы боппуруоһугар улуус депутаттара уонна баһылык Сергей Винокуров тыл тылга киирсибэтэхтэрин туһунан суруйан турабыт. Халбаакылар киин ититэр ситими тардары туруорсубуттара ыраатта. Боппуруос быһаарар быһаартарар инниттэн сорохтор администрация иннигэр пикеттээри оҥостубуттара. Бүгүҥҥү күҥҥэ Бүлүү уопсастыбаннаһыгар онуоха-маныаха диэри эрэл кыыма үөскээбит курдук. Пикет тохтоото.
Бу күннэргэ Дьокуускайтан оннооҕу коммунальнай хаһаайыстыба үлэтин быһаарса «СӨ ОДьКХ» ГУП кылаабынай инженерин солбуйааччы Виталий Готовцев тиийдэ. Бүлүүтээҕи филиал үлэһиттэрин кытта Халбаакыга тахсан, үлэлии турар хочуолунай туругун, кыамтатын көрдүлэр. Тустаах тэрилтэ кылаабынай инженерин солбуйааччы Виталий Готовцев: «Баран көрөн-истэн кэллибит. Халбаакы хочуолунайа үлэлээбитин курдук үлэлии турар. Эбийиэк кыамтата хайаан да улаатыан наада», – диэн санаатын үллэһиннэ.
Оттон Халбаакы нэһилиэгин баһылыга Алексей Васильевтан ыйыталаспыппытыгар: «Хочуолунайы көрөн-истэн бардылар. 2013 сыллаахха хапытаалынай өрөмүөн ыытыллан, уопсай туруга үчүгэй. Хамыыһыйа эбийиэк кыамтатын улаатыннарар инниттэн эбии хочуолу уонна насос станциятын туруохтарын наада. Маны оҥорорго тустаах коммунальнай хаһаайыстыба тэрилтэтэ бэлэмин биллэрдэ. «ОДЬКХ» ГУП, улуус уонна нэһилиэк бүддьүөттэриттэн кыттыгас үп көрүлүннэҕинэ, бу боппуруос түргэнник быһаарыллар кыахтааҕын эттилэр», – диэн быһааран биэрдэ.
Cөптөөх болҕомто ууруллан, тохсунньу 25 күнүгэр Бүлүү улууһун дьаһалтатын иннигэр Халбаакы олохтоохторо пикет оҥоруохтаахтарын онуоха-маныаха диэри тохтоттулар. Ол туһунан пикети тэрийээччи Валентин Павлов батсаап ситиминэн иһитиннэрдэ.
Санатар буоллахха, халбаакылар улуус баһылыга бу сыллааҕы улуус бүддьүөтүн докумуонугар илии баттаабатаҕын иһин пикеккэ тахсарга соруммуттара. Бу иннинэ дьокутааттар алмаас дивиденин икки хайысхаҕа туһанарга быһаарбыттара. 18 мөл. солк элбэх оҕолоохторго түҥэтиллибит учаастакка инфраструктураны оҥорууга уонна 16,5 мөл. солк өрүс уҥуор сытар Халбаакы нэһилиэгэр киин ититэр ситими тардыыга туһанарга куоластаабыттара.
Билигин улуус дьаһалтата алмаас дивиденин үбүн Култуура дьиэтин тутууга туһанар этиитин уларыппакка олорор.
Дьокутааттар сэбиэттэрин сессиялара өйүүн, тохсунньу 27 күнүгэр буолар. Онно улуус бүддьүөтэ ылыныахтара. Оттон алмаас дивидениттэн киирэр 34, 5 мөл. солк суумалаах үп резервнэй пуондаҕа угуллуоҕа. Салгыы ити айдааннаах үбү үллэрэргэ анал хамыыһыйа тэриллэн үлэлиэҕэ. Хамыыһыйа этиитин улуус дьокутааттарын сэбиэтэ олунньутааҕы сессияҕа көрүөхтэрэ.
Иван Васильев.