Бу күннэргэ бастаан социальнай ситимнэринэн, онтон интернет-сайтарга Бүлүү полициятын ГИБДД-тын иниспиэктэрдэрэ туппут итирик суоппардарын маатыралыы-маатыралыы охсуолуур видеолара тарҕаммыта.
Бу чахчынан силиэстийэ уорганнара от ыйын 15 күнүгэр процессуальнай бэрэбиэркэ саҕалаабыттара.
Оттон от ыйын 17 күнүгэр холуобунай дьыала тэрийдилэр. РФ Холуобунай кодексатын 286-с ыст. 3-с чааһын «а», «б» пууннарынан. Ол эбэтэр, күүһү уонна анал сириэстибэлэри туттан туран, дуоһунас боломуочуйатын аһара барыы бэлиэтэ баарынан. Дьыала видеоҕа көстөр үс полицейскайга үһүөннэригэр тэриллибит. Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Силиэстийэ сабаҕалыырынан, бу дьыл от ыйын 2 күнүгэр, түүн 03.00 чаас саҕана, Бүлүүтээҕи полиция ГИБДД-тын отделын начальнигын эбээһинэһин быстах кэмҥэ толорооччу, отдел иниспиэктэрэ уонна СӨ ИДьМ-тын ГИБДД-тын анал взводуттан командировкаҕа тиийбит иниспиэктэр патруллуу сылдьыбыттар.
Силиэстийэ быһаарбытынан уонна видеоҕа да көстөрүнэн, биир суоппары арыгы иһэн баран уруулга олорууга уорбалаан туппуттар уонна алкотестерга үрдэрэ сатыыллар. Киһилэрэ понятойдардаах эрэ үрэбин диэн аккаастанар, киниэхэ «видеорегистратор устар, онон, понятойдар наадата суохтар» диэн быһаара сатыыллар. Суоппар бэриммэт. Тыла булдьуруйбутуттан сылыктаатахха, чахчы улахан холуочук биитэр итирик олорор.
Онтон инники олорбут иниспиэктэр тулуйа сатаан баран, массыынаттан ойон тахсан, анараа өттүнэн эргийэн кэлэн, ааны астараат, бу суоппары бастаан кэтэххэ хаста да саайар, онтон илгиэлээн-охсуолаан киирэн барар, бэл диэтэр, муомахтыыр курдук туттар. Ол тухары маатыранан үөхсэр.
Кэлин олбоххо олорбут нуучча иниспиэктэрэ киниэхэ көмөлөһөн, суоппары илиитин кэдэрги тутан, наручник кэтэрдэргэ көмөлөһөр.
Онтон үһүс иниспиэктэр киирэн, тутуллубут киһини хаста да быарга охсуолуур.
Бу иниспиэктэрдэргэ Ис дьыала министиэристибэтин Куттал суох буолуутун управлениетын суһал-ирдиир чааһын сотрудниктара сулууспанан бэрэбиэркэ ыыталлар.
Видео киэҥник тарҕанан, биллэн турар, улахан айдааны, санаа атастаһыытын, дьүүллэһиини таһаарда. Сорохтор полицейскайдары өйдүүллэр, өйүүллэр, көмүскүүллэр — итинник итирик суоппардар буруйдарынан оҕо, дьон суорума суолланар, оттон кинилэр хаайыыга аҕыйах сыл олороот босхолонуохтара, салгыы олоруохтара, оттон өлбүт дьону төннөрбөккүн, сөпкө гыммыттар диэн.
Оттон сорохтор сэмэлииллэр — төһө да итирик суоппар буолбутун иһин, сокуон дьоно бэйэтэ сокуону тутуһуохтаах, кэһиэ суохтаах, тутуллубут дьоҥҥо илиитин көтөҕөр, кырбыыр бырааба суох диэн. Ньиэрбэтэ тулуйбат киһи ис дьыала уорганнарыгар үлэлээбэтэҕэ ордук диэн.
Хайа да өрүттэр этэллэрэ оруннаах эрээри, полицейскайдар, «Полиция туһунан» федеральнай сокуонунан «илиилэрэ-атахтара» баайыллыбыт дьон, тутуллан баран улаханнык өрөлөспөт, утарыласпат киһиэхэ анал сириэстибэлэри (дубинканы, наручнигы уо.д.а.) туттар, буолаары буолан, охсуолуур, кырбыыр бырааптара суох!
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.
Видео: http://news.ykt.ru/