Бүлүүгэ тулаайахтарга анаан тутуллубут дьиэни быйыл сайын өрөмүөннүөх буоллулар
Бэҕэһээ Дьокуускай куораттан СӨ Ил Дарханын уонна бырабыыталыстыбатын дьаһалтатын салайааччытын солбуйааччы Михаил Слепцов салайааччылаах анал хамыыһыйа Бүлүү куоракка тиийэн, Мир уулусса 100 “а” 1-кы кыбартыыра хаһаайыннара Сардаана Саввинованы, Полион Никифоровы кытта көрүстэ. Хамыыһыйа кыбартыыра иһин үчүгэйдик сыныйан көрдө, хаһаайыннар санааларын иһиттэ. Төһө даҕаны халлаан сылыйбытын үрдүнэн кыбартыыра иһэ тымныы. Ол аата хаачыстыбата суох тутуллубут дьиэ диэн бигэ санааҕа кэлиллэр.
Александр ТАРАСОВ, «Саха сирэ» хаһыат, https://edersaas.ru
Былырыыҥҥыттан саҕалаан “Саха сирэ” хаһыакка Бүлүү куоракка тулаайахтарга анаан тутуллубут дьиэлэр муосталара тымныы, эркиннэринэн тыал курдат сылдьарын туһунан элбэхтик сурулунна. Санатар буоллахха, былырыын алтынньы саҕана улуустааҕы «Олох суола» хаһыат маҥнайгы балаһатыгар төгүрүк тулаайахтарга уонна төрөппүттэрэ суох хаалбыт оҕолорго анал судаарыстыбаннай бырагырааманан тутуллубут хас даҕаны дьиэ тымныыларын туһунан ис хоһоонноох аһаҕас сурук тахсыбыта. Билигин СӨ Ил Дарханын уонна бырабыыталыстыбатын дьаһалтатын салайааччытын солбуйааччы Михаил Слепцов салайааччылаах анал хамыыһыйа Бүлүүгэ үлэлээтэ.
Улуус дьаһалтата өрөмүөҥҥэ 3,5 мөл. солк көрүөҕэ
Арбитражнай суут түмүгүнэн туппут тэрилтэни кытта эйэлэһиигэ сөбүлэһии түһэрсиллэн, былырыын атырдьах ыйын 1 күнүгэр диэри дьиэни өрөмүөннүөхтээх этэ. Ол гынан баран, “Ене-Строй” ХЭУо күһүн үрдүнэн-аннынан харах баайан өрөмүөннээбитэ буолан баран, сүтэн хаалбыт.
Тымныы кыбартыыра иһигэр буолбут кэпсэтиигэ кэмигэр улуус дьаһалтатын бэрэстэбиитэллэрэ дьиэ өрөмүөнүн атырдьах ыйын 1 күнүгэр диэри бүтэриэхпит диэн эрэннэрдилэр. Михаил Слепцов кыбартыыра хаһаайыннарыгар атырдьах ыйын 1 күнүгэр диэри өрөмүөн толору ыытыллыа диэн СӨ бырабыыталыстыбатын аатыттан эмиэ эрэннэрдэ. Дьиҥэр, “Ене-Строй” ХЭУо гарантийнай болдьоҕун быһыытынан хапытаалынай өрөмүөнү оҥорор толору бырааптаах этэ даҕаны, моҥкуруут барбытыттан сылтаан, ити дьыала быһаарыллара ыраах.
Бүлүү улууһун баһылыгын солбуйааччы Андрей Лобашев улуус бүддьүөтүттэн Мир уулусса 100 “а” аадырыска турар 20 кыбартыыралаах дьиэ маҥнайгы этээһин өрөмүөннүүргэ 3,5 мөл. солк көрүллүө диэн эттэ.
Бүлүү улууһун дьаһалтатын тутууга управлениетын начаалынньыга Владимир Степанов: “1-кы кыбартыыра ис эркинин, муостатын итиини тутар матырыйаалынан эбии бүрүйүөхпүт, саҥа түннүктэри олордуохпут уонна эбии ититэр радиатордары туруоран бириэхпит”, — диэтэ. Манан эрэ бүппэт. Дьиэни тас өттүттэн итиини тутар матырыйаалынан эбии үллүйэн биэриэхтэрэ. Ити үлэни тэрийэргэ 3,5 мөл солк. хайдах эрэ татым соҕус курдук эрээри, Андрей Лобашев этэринэн, өрөмүөн сметата оҥоһуллан бэлэм эбит.
Дьиэни көрүү-истии кэнниттэн СӨ Ил Дарханын уонна бырабыыталыстыбатын дьаһалтатын салайааччытын солбуйааччы Михаил Слепцов кулун тутар 20 күнүгэр диэри дьиэҕэ өрөмүөнү ыытыы былаанан оҥорон бүтэрэн, ону уопсастыбаннай хамыыһыйаны кытта бигэргэтэллэригэр эттэ.
СӨ үлэҕэ уонна социальнай сайдыыга миниистирин солбуйааччы Зинаида Максимова Бүлүү куоракка өссө маннык хабааннаах икки дьиэ тутулла турарын бэлиэтээн туран, балар хаачыстыбаларын бэрэбиэркэлиир анал уопсастыбаннай хамыыһыйаны тэрийэллэригэр этии киллэрбитин бары өйөөтүлэр. Санатар буоллахха, бүгүҥҥү күҥҥэ улуус борокуратуурата тулаайах хаалбыт оҕолору көмүскүүр сыалтан суут дьыалатын саҕалаата.
Михаил Слепцов, СӨ Ил Дарханын уонна бырабыыталыстыбатын дьаһалтатын салайааччытын солбуйааччы:
—Бу боппуруоһу кытаанах хонтуруолга ыллыбыт. “Ене-Строй” ХЭУо хаачыстыбата суох туппут. Аны туран, моҥкуруут барбыт. Олохтоох дьаһалта тулаайах оҕолору сылаас дьиэнэн хааччыйар эбээһинэстээҕин быһыытынан бүддьүөтүттэн үп көрөн, быйыл сайын Мир уулусса 100 “а” дьиэни үчүгэйдик өрөмүөннүөх буолла.