Бүлүү бөлөх улууһун ыччатын сийиэһигэр Ньурбаттан, Үөһээ Бүлүүттэн, Сунтаартан, Бүлүүттэн 200-чэ эдэр дьон кытынна. Алта хайысхаларыгар арахсан үлэлээтилэр: патриотическай иитии, экология, тыа сирин ыччата, волонтердар хамсааһыннара, олоҥхо уонна эдэр предпринимателлэр. Ыччат миниистирэ Афанасий Владимиров Саха сиригэр Ыччат сыла саҕаламмытынан эҕэрдэлээтэ.
Станислав ИОВЛЕВ, «Саха Сирэ» хаһыат, www.edersaas.ru
Бүлүү куоракка олохсуйбут эдэр ыалы кытары көрүстэ. Кинилэр туох кыһалҕаны көрсөллөрүн ыйыталаста. Эдэр дьиэ кэргэни дьиэлээһин бырагырааматын ситэ билбэттэрин, эдэр дьону өйүүр субсидияларынан толору туһамматтарын, оҕо саадыгар миэстэ тиийбэтин уо.д.а. кыһалҕалары эттилэр. Афанасий Владимиров көрсүһүүгэ ханнык социальнай көмө баарын, киирбит хас биирдии ыйытыыны сурунан ылан сыл устата үлэлэһиэх буолан эрэннэрдэ.
Салгыы сэттэ оҕолоох, гражданскайынан олорор Олеандра Кылабысова уонна Геннадий Миронов дьиэ кэргэннэрин кытары көрүстэ. Кинилэр элбэх кыбартыыралаах мас дьиэҕэ олороллор эбит. Тутуу лаппа эргэрбит. Миниистир ону көрөн: “Хаарбах дьиэ ахсааныгар киирэ илик дуо? Судаарыстыбаннай бырагыраамманан саҥа кыбартыыра биэриэ этилэрэ” — диэн ыйыталаста. Хаарбах туруктаахтар ахсааннарыгар өссө даҕаны киирэ илик эбит. Элбэх оҕолоох эдэр ыал икки хостоох кыбартыыраҕа олороллор. Алта сыллааҕыта билсэллэригэр эдэр ийэ Олеандра түөрт, оттон аҕалара Геннадий икки оҕолоох эбит. Билигин сэттис оҕолоро, саамай кыралара икки аҥаарын ааспыт уол. Улаханнара онус кылааска үөрэнэр. Кыра уол сүрэҕэр эпэрээссийэлээх. Онон ийэлэрэ үлэлээбэккэ оҕотҕн көрөн олорор. Аҕалара күн аайы Бүлүү куоракка таксистыыр. Кинилэр миниистиргэ: “Иккиэн сүрүн үлэбит суох буолан, хантан даҕаны «2ндфл» ыспыраапканы ылар кыахпыт суох. Кэргэнниибит туһунан туоһу сурук эмиэ суох. Ол иһин хантан даҕаны көмө босуобуйаны ылбаппыт. Бэһис оҕобунан учаастак ылаары кэтэһэ сатаан баран, кирэдьииккэ киирэн учаастак атыыласпыппыт. Аны дьиэ туттаары мас, матырыйаал ылыммыппыт. Билигин харчыбыт суох буолан сатаан тутта иликпит. Бэһис оҕобутунан бэриллэр учаастакпытын соторутааҕыта биэрбиттэрэ. Биир мөлүйүөн сууммалаах харчыны ылыахпыт өссө даҕаны ыраах. Уочараттыы сылдьабыт. Ол харчыны биһиги түргэнник ылар кыахтаахпыт дуо...” диэн сүрүн кыһалҕаларын кэпсээтилэр. Афанасий Владимиров бу ыалы көрөн баран тустаах дьоҥҥо кинилэри хаачыйалларыгар, үчүгэйдик көрөллөрүгэр сорудахтаата.
Күн иккис аҥарыгар миниистрир сийиэс кыттыылаахтарын көрүстэ, Ыччат сылыгар туох үлэ барыахтааҕын сырдатта, ыйытыыларга хоруйдаата. Түөрт улуус ыччатын лидердэрэ быйылгы Ыччат сылыттан саҕалаан бииргэ үлэлэһэр туһунан сөбүлэҥ түһэристилэр.
Алта хайысха үлэтин түмүктээн, түмүк таһааран, пленарнай заседанияҕа хайысха салайааччылара ханнык ыйытыылар киирбиттэрин, тугу үлэлээбиттэрин, саҥа идеяларын кэпсээтилэр. Бүлүү ыччатын иккис сийиэһэ Ыччат баалынан түмүктэннэ.
Ыспыраапка:
Бүлүү улууһун ыччатын маҥнайгы сийиэһэ 2013 сыллаахха буолбута. 2014 сыллаахха Бүлүүгэ өрөспүбүлүкэтээҕи Ыччат ыһыаҕа ыытыллыбыта. Быйыл кырдьаҕас куорат Олоҥхо ыһыаҕын көрсөргө бэлэмнэнэр.
Станислав ИОВЛЕВ. «Саха Сирэ» хаһыат, www.edersaas.ru