Уопсастыба

Бүлүүгэ «Сыл иитээччитэ-2020» күрэс буолла

Бүлүүгэ оҕо уһуйаанын үлэһиттэригэр «Сыл иитээччитэ-2020» бэртээхэй күөн күрэс буолбут.
Бу идэ суолтатын үрдэтэр, үлэ үөрүйэҕин атастаһар, оскуолаҕа киириэн иннинээҕи саастаах оҕолору үөрэтэр талааннаах, дьоҕурдаах педагогтары уонна кырачааннары иитэр үрдүк эппиэтинэстээх үлэҕэ сонуну, саҥаны тобулан киллэрээччини көрдүүр, булар соруктаах тэриллэр диэн улуус дьаһалтатын саайтыгар үөрэх управлениетын оскуолаҕа киириэн иннинээҕи саастаах оҕолор отделларын начаалынньыга Лариса Шамаева иһитиннэрбит.

Кини коронавирус дьаҥын тарҕаппат, бохсор туһуттан, күөн күрэс ыраахтан олорон ZOOM платформанан ыытыллыбытын этэр. Манна Бүлүүттэн, Бөтүҥтэн, Сыдыбылтан, Лөкөчөөнтөн, Хампаттан, Чинэкэттэн, уопсайа 12 буолан кыттыбыттар.

Күрэс үс түһүмэҕинэн ыытыллыбыт. Кэтэхтэн ыытыллыбыт «Интернет-ресурс» түһүмэххэ оскуолаҕа киириэн иннинээҕи саастаах оҕолору үөрэтэр тэрилтэ интернет-саайтыгар алтынньы 10 күнүгэр диэри методическай үлэлэрин, үөрүйэхтэрин билиһиннэрбиттэр. Үлэни сырдатыы хаартысканан, видеонан киллэриллибит.
Куйаар ситиминэн ыытыллыбыт иккис түһүмэххэ кыттааччылар тиэмэлэрин бэйэлэрэ талан, биир тиэмэҕэ сибээстээх тэрээһини ыытан көрдөрбүттэр. ZOOM форматынан үһүс түһүмэххэ, инники күрэстэргэ элбэх баалы ылбыт биэс күрэстэһээччи (лауреаттар) киирбит. Манна кыттааччылар профессиональнай  хаачыстыбалара, социальнай, гражданскай позициялара көрүллүбүт. Күрэстэһээччилэр бэйэлэрэ талбыт тиэмэлэригэр маастар-кылаастары ыыппыттар.

Түмүккэ «Бастыҥ интернет-ресурс» анал ааты  Сивцева Августина Васильевна («Аленушка» оҕо саадын иитээччитэ, Бүлүү), «Верность профессии» Герасимова Мария Степановна («Кустук», Бүлүү), «Надежда дошкольного образования Вилюйского улуса» анал ааты Осипова Анна Васильевна («Веселые нотки», Бүлүү), ылбыттар.

«Сыл иитээччитэ-2020» күрэс улуустааҕы түһүмэҕин кыайыылааҕынан Шамаева Мария Александровна («Кэскил» оҕо саадын иитээччитэ, Хампа) тахсыбыт. Лауреаттарынан Васильева Маргарита Романовна («Сардаана», Бүлүү) уонна Веревкина Людмила Александровна («Туллукчаан», Бүлүү) буолбуттар.

Кыайыылааҕы, лауреаттары, номинаннары эҕэрдэлээбиттэр. Кыайыылаах үүнэр 2021  сылга улууһун аатын өрөспүүбүлүкэтээҕи күрэскэ көмүскүөхтээх.

0
0
Telegram @edersaas20

Добавить комментарий